Ray Lauffeur ta presenta ‘mash-up’ di Distance i Shape Of You


Un aserkamentu diferente

WILLEMSTAD/ Su kresementu den farándula a sosodé den presensia di tur fanátiko, saliendo for di GMO, pa despues gara konfiansa den Dreams, i finalmente su presensia di gran balor den agrupashon musikal Gentz- Ray Lauffeur tin un gran talento! Su partisipashon den Hollands Got Talent, awor ta sirbi komo un paréntesis importante den su kuríkulo. No di awor, sino pa hopi ratu Ray Lauffeur ta demostrá afinidad pa interpretá piesanan  internashonal, algu ku e ta hasi ku hopi éksito den e konstelashon di AxL & Friends. Den fin di siman último Ray su talento a bolbe keda demostrá durante apertura di e brùg na Green Corrdior na Aruba, na momentu ku huntu ku Randy Leroy e’la interpretá un medley di reggaetón ku a kai masha na smak i a wòrdu kanta pa e públiko inmenso ku tabata presente.

Resientemente, Ray bou di direkshon di kas di produkshon Decoded a lansa un ‘mash-up’ komo un introdukshon pa algun single ku próksimamente lo keda produsí, esaki formando parti di un proyekto  independiente di Ray. Loke ya kaba ta un tendensia masha popular riba YouTube, awor ta haña un introdukshon na Kòrsou- e ‘mash-up’ – un kombinashon di e kansionnan “Distance” di Omarion  i “Shape Of You” di Ed Sheeran a kuminsa zona na radio-emisoranan lokal den bos di Ray Lauffeur. Un swing apart!

Randy Rosheuvel i Christopher Walle a kolaborá ku e single dor di hasi e reprodukshon, di ámbos kansion. E ‘mash-up’ di género musikal urban-pop a risibí un aseptashon masha positivo. Resientemente a kompartí algun minüt di e seshon di grabashon riba Face book tambe. Por sigui Ray riba instagram @RayLauf i Facebook @RayLauffeur. Fanatikonan por mira e videoclip riba e Youtube Channel @decodedofficial òf solisit’é na nan radio preferí. Ademas, por stream riba ITunes, Spotify, Google Play i Apple Music.