Philipsburg, St. Maarten – Djaluna, 7 novèmber, 2016: Resientemente RBC Merchant Bank (Caribbean) Ltd. a organisá un evenemento na St. Maarten pa selebrá e emishon eksitoso di un bono di $32 mion di TelEm. E emishon di bono a keda reglá pa RBC i e firmamentu ofisial ku TelEm a tuma lugá na òktober, después di lunas di negosashon.

RBC a organisá un enkuentro informal pa TelEm Group, e invershonistanan i e tim di transakshon pa selebrá e akuerdo ku a keda firmá i tambe pa rekonosé e trabou i sostén ku a kontribuí na e éksito di e transakshon. E emishon di bono ta representá un prestashon notabel di tantu RBC komo TelEm.

TelEm Group lo usa e fondonan di e emishon di bono pa finansiá futuro invershonan i pa refinansiá debenan eksistente. E bono ta un komplementashon riba un fiansa di €8 mion di e Europese Investeringsbank (EIB) aña pasá pa e proyekto di ‘Fibre to the Home’ pa hinter St. Maarten. Seis invershonista grandi a suministrá e kapital nesesario pa e bono. Esaki ta e di dos bia ku TelEm Group a aserká merkadonan di kapital regional ku éksito pa asina segurá finansiamentu di invershonistanan regional, asina Helma Etnel, e Chief Financial Officer di TelEm Group a duna di konosé. E bono i seguidamente e akuerdo di fiansa a sòru ku TelEm por a renegoshá eksigensha i kondishonnan mas faborabel. E kompania di telekomunikashon no mester duna kuenta i rason na diferente finansiadó mas, manera antes tabata e kaso, pero solamente na un kompania via di un trustee.

Andrew Boissiere, Vice President Corporate and Investment Banking na RBC Merchant Bank ta bisa: “Nos ke logra nos meta dor di yuda nos klientenan krese. E proseso di transakshon a keda karakterisá pa retonan, sorpresanan i negosashonnan delikado. Sinembargo, un aserkamentu inovativo i flèksibel, kolaborashon regional i teamwork a kontribuí na un resultado eksitoso. Nos ta sumamente orguyoso di nos relashon ku e isla di St. Maarten i nos ta spera ku nos por kontinuá esaki ku e bono di TelEm. Nos ta kontentu ku nos por a duna un kontribushon na mehorashon di e infrastruktura di telekomunikashon di e isla.”

Pa enfatisá e resultado eksitoso Boissiere a otorgá TelEm Group ku algún award. “Nos ta gradesido na RBC pa e pasenshi i e trabou duru pa segurá e akuerdo di bono aki i nos ta ansioso pa wak lokual futuro ta trese”, asina Etnel a bisa.