Djasabra último Happyvilla Enrichment Center – Un akohida despues di skol (na-schoolse opvang) pa muchanan for di 2,5 aña – a organisá un Reading Fair den kuadro di Siman di Buki / Siman di BAN lesa. Algun siman pasá 13 mucha di e edat entre 7 i 11 aña a skohe un buki pa nan lesa i pa na final, den e Siman di Buki, presentá esaki riba un drieluik presentatiebord. E muchanan no solamente mester a traha e arte aki nan mes, pero mester a traha tambe un resúmen di e buki i kontestá algun pregunta relashoná ku e buki. E dos ekspertonan pedagógiko di Happyvila Enrichment Center a bin ku e idea pa laga e muchanan traha e drieluik presentatiebord, pa mustra nan kreatividat dor di representá esaki den un arte. E Reading Fair tin komo meta pa stimulá e muchanan pa nan lesa, kompronde kiko nan a lesa i pasa esaki over pa otronan komprondé. “Na skolnan sekundario, alumnonan mester lesa diferente buki pa despues kontesta preguntanan relshoná ku e buki. Esaki ta un parti di e eksamen pa e alumno por finalisá su skol sekundario. Algu asinaki nos a laga nos muchanan hasi, naturalmente adpatá riba e nivel di nan edat. Nunka no ta muchu trempan pa siña. E palabra “Enrichment” den nomber di nos skol ta nifiká “Enrikesé”. Pa nos ta hopi importante ku e muchanan, despues ku nan sali for di skol i bini akinan, ta siña algu ku ta importante pa nan den komunidat”. Asina pedagogo Kimberly Gario a indiká djasabra último durante e Reading Fair. Un total di sinku (5) persona a forma parti di e tim di hurado. Entre esakinan tabata tin sr. Leo Regales, Ini Statia i Marion Schroen. Kada un ku nan propio ekspertisio. E huradonan a tene un kombersashon di alrededor 10 minüt ku kada un di e muchanan pa asina haña mas informashon over di e buki ku nan a lesa. A base di e informashon ku a wòrdu kolektá lo bai saka e ganador òf ganadora. Esaki lo sosodé dia 4 di desèmber 2013, durante selebrashon di Sinterklaas na Happyvilla Enrichment Center. Happyvilla Enrichment Center ta situá na Prof. Kernkampweg #10 i ta ofresé akohida despues di skol te ku 7’or pm. Riba e página di Facebook di Happyvilla Enrichment Center por haña mas informashon: https://www.facebook.com/happyvilla.curacao