WILLEMSTAD:- Ya kaba den transkurso di siman por a skucha e piesa “More of You” na diferente radio-emisora lokal. Sigur e’lo mester a hala bo atenshon pa motibu ku e piesa aki ta realmente diferente for di tur otro. Un piesa di kual su ingrediente pa gran parti ta únikamente ‘melodia’ i na final e ta sera ku un bunita koro pregon.  “Mi tin letranan di e kansion, pero dia mi a repasá e komposishon pa por a graba e guia di e areglo, mi a namorá di e melodia i a pensa ku kisas Kòrsou ta klá pa un aserkamentu ‘out of the  box’”, esaki di akuerdo ku Carls Manuel. Carls Manuel no ta deskonosí, ya kaba e tabata tin algun kansion promoshonal ku a zona bon na radio-emisora lokal. Hasta tabata tin kansionnan ku a keda reprodusí dor di agrupashonnan lokal. Nos tur por kòrda e piesa kizomba ‘Baila Slow’.  E kantante aktualmente finalisando konservatorio na Hulanda semper a sá di distinguí su mes ku su kansionnan.  Asina por hasi menshon tambe un reprodukshon na papiamentu di e balada ‘Será’ di Ricardo Montaner, un otro balada den duo ku Dibo Doran i awor “More of You”. E kansion nobo “More of You” ta un komposishon propio i ta parti di un proyekto ku lo mester keda realisá próksimamente na Hulanda . Areglo ta di Kevin Windster i grabashon a keda realisá na AW Recordings. Solisit’é na bo radio-emisora faborito…