Willemstad – Algun tempu pasa, Refineria Isla a kuminsá informá komunidat tokante e proyekto pa pone e refineria operá riba gas mediante un pipa di gas ku lo kore entre Venezuela i Kòrsou. E komunikado aki ta parti di e proseso pa sigui tene komunidat na altura di e proyekto.

Gas ta e solushon pa polushon

Meskos ku na Kòrsou, diferente otro pais na mundu ta hasiendo esfuerso pa pone nan industrianan operá na un manera ku ménos impakto riba medio ambiente. Asina ei ya tin diferente refineria na mundu ku ta operá riba gas. Un refineria ku ta operá riba gas ta saka ménos emishon i ta redusí impakto riba medio ambiente. E refineria di Shell Pernis na Hulanda, por ehèmpel, ta un di e modelonan di kon, mediante operashon riba gas, ta redusí i mitigá polushon.  Den linea ku desaroyonan global, Refineria Isla tambe ta trahando pa  hasi e kambio aki i bai operá riba gas pa asina ei e refineria limitá emishon i hasi un impakto mínimo riba nos medio ambiente.

Na mundu ya tin diferente pipa di gas den fondo di laman

Estudionan i análisis a mustra ku tresiendo i usando gas for di Venezuela lo ta un di e maneranan mas efisiente i efektivo pa pone Refineria Isla operá riba gas. E teknologia i sistema di pipa di gas den fondo di laman no ta algu nobo ni úniko. Por ehèmpel den fondo di laman mediteráneo ya tin un pipa di gas ta kore entre Italia i Spaña. Meskos, aktualmente na Israel i Europa, nan ta preparando un proyekto pa un pipa di gas den laman ku lo kubri un distansia di 2000 km ku lo transportá gas pa entre otro Gresia i Italia. Manera ya ta konosí, Aruba tambe ta trahando riba su respektivo proyekto pa pone pipa di gas for di Venezuela den fondo di laman. Esaki ta sosodé lòs for di e proyekto na Kòrsou. Den e fase aktual, Refineria Isla ta hasiendo uso di e servisionan di e kompania Doris Engineering i Axens ku ambos tin basta eksperensia ku tipo di proyektonan aki. Den e siman di 15 di mei, un ekipo di kuater (4) profeshonal di Refineria Isla lo hasi un bishita di trabou na Axens na Fransia pa sigui traha riba desaroyo di e proyekto.

E pipa di gas lo kore entre Estado Falcón i kosta sur di Kòrsou

E pipa di gas pa Refineria Isla lo sali for di Falcón na Venezuela i drenta na e kosta sur di Kòrsou. E pipa lo kubri un distansia di alrededor di 80 km i lo tin un diameter entre 14 pa 16 duim. Ya kaba a identifiká sinku (5) posibel sitio kaminda e pipa lo mester por yega tera. Pronto lo bai analisá kua di e sitionan aki ta esun di mas faborabel.

Servisionan di Gobièrnu ta dunando bon koperashon

Refineria Isla ta sosteniendo interkambio ku diferente instansianan i departamentunan gubernamental manera entre otro “Maritime Authority” di Kòrsou (MAC), ROP, Departamentu Ambiental i Carmabi. Refineria Isla tin hopi apresio pa e manera kon e instansianan ta aportando na e proyekto. Na momento ku tin desaroyo nobo rondó di e proyekto di pipa di gas den fondo di laman, Refineria Isla lo bolbe duna komunidat informashon adishonal.