Willemstad – Curaçao Innovation & Technology Institute (CITI) ta invitá, tur persona òf empresa ku proyektonan inovativo, pa partisipá na Curacao Innovation Award 2017. Inskripshon ta habrí te ku dia 24 di sèptèmber 2017 i mester yena formulario riba e wèpsait www.innovationaward.cw. Curacao Innovation Award ta un evento anual pa invitá komersiantenan inovativo pa partisipá i alabes motivá komersio en general pa pensa i aktua inovativo den nan empresa. E ta un inisiativa di Ministerio di Desaroyo Ekonómiko i CITI.

E ganadonan lo risibí e titulo di empresa of proyekto inovativo di aña. Tambe lo tin mas di 10 mil florin na premio repartí entre e ganadonan. Ademas e presentashon di e demas partisipantenan ta fungi komo fuente di inspirashon pa otronan. Pa kada un di e 6 kategorianan CITI a aserka un organisashon, ku a base di nan ekspertisio, por analisá partisipantenan i skohe un ganado. Pa loke ta e kriterionan i puntuashonan CITI a enkarga UOC, kende a hasi un tremendo trabou.

E kategorianan i e organisashonnan ta respektivamente:

Business Innovation Award den kolaborashon ku D&I.

Social Innovation Award konhuntamente ku Curacao Cares.

Sustainable Innovation Award lo ta na enkargo di Bedrijvenplatform Milieu (BPM),

Junior Innovation Award den kolaborashon ku JCI IOBA miéntras ku e premio máksimo, Curacao Innovation Award, lo ta na enkargo di CITI i Ministerio di Desaroyo Ekonómiko. E kategoria ku ta gosa di un gran popularidat ta People`s choice award ku ta e premio otorgá na esun ku mas voto riba medionan sosial. Tantu partisipashon na e evento i entrada durante e anochi di premiashon na Novèmber próksimo ta grátis. Di e manera aki e evento lo ta habrí pa henter Kòrsou por ser inspirá di e diferente inovashonnan ku lo keda presentá. Pa mas informashon tuma kontakto ku CITI na analies.hooi@citi.cw òf 7386299. Like e facebook di Curacao Innovation Award i keda na altura di tur desaroyo di e prestigioso premio aki.