‘diva’ bo ta klá pa Stilleton Run?
WILLEMSTAD MEI 2013– Renaissance Mall i Rif Fort ta klá pa presentá e di kuater edishon di e kareda pa dama riba hilchi haltu kombiná ku un eksposishon di beyesa i salú dia promé di Yüni próksimo komo klousura di Renaissance Mall i Riff Fort su kampaña dediká na nos hende muhénan “Ladies First Campaign”.
Djasabra promé di yüni nos damanan lo por disfrutá di un atardi plasentero kuminsando for di 3’or di atardi te ku 7’or di anochi. E dia lo kuminsá ku un tremendo eksposishon di beyesa i salú ku lo ofresé diferente informashon i tepnan balioso. Pa 4’or di atardi lo duna inisio na e kompetensia riba hilchi ku lo terminá 5’or di atardi. Ta bon pa menshoná ku ainda tin algun lugá habri pa esnan ku ta interesá pa partisipá. Ta kòrda tur dama ku e hilchi di sapatu mester ta mínimo 9 centimeter, e sapatu mester ta será òf mester tin strep, e sapatu no tin mag di pasa ènkel, no tin mag di bisti mea ni sapatu ku hilchi yená, no tin mag di usa tape, e sapatu mester keda den su estado original, mester yega final di e kareda ku ámbos sapatu na pia i no tin mag di pusha, dal òf blòkia otro partisipante durante e kareda. Lo tin premio pa vários kategoria, asina por menshoná ku tin premio pa e partisipante ku kore mas duru, premio pa e sapatu i vestuario mas kreativo. E aña aki lo tin un total di 3 kareda; lo repartí tur partisipante den dos grupo i e ganadornan di ámbos grupo lo kore kontra di otro den e kareda final pa asina saka e ganador apsoluto. E seremonia di premio lo wòrdu tene entre 6’or di atardi i 7’or di anochi. Durante hinter e evento lo tin músika bibu na enkargo di Dj NRG.
Ta bon pa menshoná ku durante e dia aki ainda por depositá kupòn ku a keda risibí na kompra di Naf. 25 òf mas den kada establesimentu respektivamente. Pues tur ku a depositá nan kupòn lo ta den e sorteo di e kampaña “Ladies First Campaign” kual tambe lo tuma lugá dia promé di Yüni próksimo pues ainda tin chèns pa hasi kompra, bishitá restorantnan òf relahá den un ambiente dushi i partisipá pa gana premionan den e ‘Ladies First Campaign’. Por haña e reglanan di e “Stiletto Run” riba e Factbook page di Renaissance Mall & Rif Fort.