24 aña bishitando Kòrsou for di Brazil

WILLEMSTAD- 17 di novèmber 2017 – sr. Aparecido a hasi 24 aña bishitando Kòrsou. Esaki sigur ta motibu pa Ofisina di Turismo di Kòrsou (CTB) duna rekonosementu na e persona aki. Sr. Aparecido ta prosedente di Brazil i e loke mas e ta gusta di nos pais ta nos playanan, kuminda i mas ku tur kos nos hospitalidat. E ta gusta e trato ku e ta risibí di nos hendenan kada biaha ku e bishitá nos pais. Durante e añanan ku e tin ta bishitá Kòrsou el a yega di hospedá na diferente hotèl riba nos isla inkluyendo Hotel Las Palmas i tambe Plaza Hotel. Tambe sr. Aparecido sa keda serka konosínan. Semper e ta trese famia i amigunan pa nan tambe konosé nos dushi pais. E biaha aki sr. Aparecido a bini ku 3 amigu. Un di e amigunan ku e la trese pa konosé Kòrsou ya tin 15 aña biniendo Kòrsou. Ku esaki por konkluí ku sr. Aparecido ta un bon embahador pa nos pais. Direktor interino di CTB, sr. Hugo Clarinda a hasi entrega di un plakat di rekonosementu i tambe un regalo na sr. Aparecido i naturalmente a invit’é pa e sigui trese mas famia i konosí pa bishitá nos dushi pais Kòrsou.