WILLEMSTAD – Remses Rafaela tin un konekshon fuerte ku e komunidat multikultural
di Afrikaanderwijk, Rotterdam, unda e ta biba pa mas ku dies aña. Remses ta
kolaborando ku diferente organisashon pa krea mas posibilidat pa nos hendenan i asta
a partisipá na mart 2022 na e elekshon di konseho di bario. 22 di aprel próksimo,
Remses, den su kapasidat komo guia, lo duna públiko general un oportunidat pa
eksperensia e promé parti di e ruta ku Rei Willem Alexander i Reina Maxima lo kana
durante nan bishita na e bario pa Dia di Rei 2023.
Afrikaanderwijk, un bario ku hopi karakter
Afrikaanderwijk ta un bario ku hopi karakter ku Afrikaandermarkt komo e sentro di
ambiente. E zona residensial a keda fundá rònt di 1900 ora e haf di sùit Rotterdam a keda
kobá. E distrito a haña su nòmber i e nòmbernan di kaya basá riba Suráfrika en general i e
lidernan di e Afrikaners durante e di Dos Guera di e Boers na 1899 pa 1902.
Durante e bishita di e Pareha Real, tin 11 kòmbersashon programá na Afrikaandermarkt i
varios otro lugá stratégiko den e bario. Esaki ta inkluí un bishita na e moské, e hardin
botániko i un paseo pa taxi akuatiko ku lo hiba e Pareha Real na e sentro di suidat pa
kontinuá e di dos ora di nan bishita na Rotterdam. Kanal di televishon hulandes, SBS 6 lo
kubri e bishita monumental na Afrikaanderwijk, poniendo e habitantenan di e bario den un
lus positivo. Tambe, emisora di radio NOS lo hasi un entrevista ku Remses komo guia di e
ruta. Si bo ta na Hulanda i bo ke eksperensia e mitar ruta ku Remses lo guia Día di Rei, bo
por inskribí na www.koningsdaginrotterdam.nl pa hasi esaki djasabra awó, 22 di aprel.

Un temporada yená ku aktividat
E aña aki, Remses ta guiando diferente empresario ku ta hasi negoshi riba tereno kultural.
“Mi ta haña hopi importante pa invertí den nos komunidat i kompartí mi konosementu i
sabiduria,’ Remses a splika. Despues di hopi petishon e fundashon enkabesá pa Remses,
Passion & Skillz, lo bai tin e zomer aki tres edishon adishonal di ‘Keukengesprekken’ na
edifisio di ‘Het Gemaal op Zuid’ den Afrikaanderwijk.
Adishonalmente, Remses lo hasi un gira kòrtiku ku ‘Topa,’ un otro produkshon kreativo ku
ta ilustrá kon baile i músika por konektá diferente hende ku e kultura afro karibense.
Tambe Remses ta uni forsa pa algun presentashon ku e talentoso músiko Vernon Chatlein
pa su proyekto investigativo titulá ‘Kimina’. Durante ‘Kimina,’ Remses ta baila den e parti
titulá ‘Tambú.’ Na mei i kuminsamentu di yüni, Remses lo forma parti di e gira ku Orkesta
Filharmoniko di Rotterdam i e ensayonan ya a kuminsá e siman aki.
Pa mas informashon di tur su proyektonan, sigui Remses Rafaela riba su plataforma sosial
manera Facebook.com/remses.rafaela i Instagram.com/muisjemuis of riba su wèpsait www.passion-and-skillz.com.