…Photoshoot pa cobertura di 20 pagina…

ORANJESTAD –Maart – Renaissance Aruba Resort & Casino den cooperacion cu ATA recientemente tabata anfitrion pa e revista hulandes Vogue cu a bishita Aruba cu un team di profecional riba tereno di moda pa realisa un photoshoot pa e siguiente edicion di e revista cu lo brinda su lectornan un edicion diferente cu un toke Caribense. Pa esunnan cu no conoce e revista Vogue, e revista aki a origina na Merca y ta concentra riba moda internacional y lifestyle. E prome revista Vogue a wordo publica na 1892 y tabata tin como grupo meta e populacion femenino. Den transcurso di añanan Vogue ta wordo publica na mas cu 20 pais entre otro Australia, Brazil, China, India, Alemania, Italia, Portugal, Spaña, Mexico y Hulanda. For di 22 di maart 2012 e revista ta obtenibel na Hulandes tambe. Esaki ta haci cu Vogue realmente ta un revista di moda reconoce rond mundo. Pa Renaissance Aruba Resort & Casino tabata un placer pa host e team di Vogue cu a consisti di e modelo Nimue Smit kende a ya a aparece den varios edicion di Vogue y ta modelo pa casnan di moda manera Prada, Calvin Klein, Chanel, Dolce & Cabbana y Louis Vuitton, Ester van Vreden Productor di Moda, Marije Goekoop, editor di moda/stilista y Marc de Groot, fotografo profesional. Den e edicion aki Aruba lo ricibi un cobertura di 20 pagina. Pa por cubri e cantidad di pagina aki e team di Vogue a bishita varios sitio turistico y a pone atencion special riba Renaissance Island y Crystal Casino. E revista lo ta riba mercado na Hulanda den luna di Juli/Augustus proximo. Cada bishita pa cobertura di Aruba den e mercado internacional ta di aprecia. Nos ta gradici Vogue Magazine Hulanda pa a scoge Aruba y Renaissance Aruba Resort como highlight den nan edicion aki. Cu e cobertura aki Aruba ta keda establece no unicamente como e destinacion Caribense preferi pero tambe como un isla consciente di moda y estilo.