ORANJESTAD – DEC–  Ya e ta un tradicion; tur hende ta papia di dje y e paranda di fin di aña no ta completo sin e pagara di Renaissance Aruba. Nota den bo agenda, dia 30 di december proximo! Renaissance Aruba Resort & Casino lo cende e pagara tradicional pa 3’or di atardi dilanti di Renaissance Marketplace! E pagara di e aña aki lo ta di 6 miyon tiro y naturalmente lo conta cu ambiente di dande. E pagara di Renaissance Aruba ta un tradicion pa años caba di MetaCorp y aunke e resort tin propietario nobo, e tradicion ta sigui! Paul Gielen, General Manager di Renaissance Aruba Resort & Casino ta comenta cu Aruba ta conta cu e pagara tur aña y a keda demostra cu riba dia 30 di december e ambiente dilanti di Renaissance Aruba ta total!

Pueblo di Aruba ta invita pa habri aña nobo hunto cu e famia grandi di Renaissance Aruba Resort & Casino. Probecha di haci e ultimo shopping prome cu aña caba y ainda participa den e fenomenal Shop & Win di Renaissance Aruba Mall. E aña aki clientenan cu shop tin chance di gana diferente premio e.o un cena pa dos persona na L.G. Smith’s Steak & Chop House, lunch pa dos persona na Aquarius Restaurant, cena pa dos persona na Fresco Restaurant, un Royal Romance na Okeanos Spa, un Gift Certificate di $100 y manera ya anuncia un biahe pa New York incluyendo hotel y un weekendstay na Renaissance Aruba Resort & Casino. Presenta bo recibo di compra na e promo booth den Renaissance Mall y cambia esaki pa un coupon. Dia 3 di januari proximo lo saca e ganadornan cu lo tin chens di gana diferente premio atractivo. Renaissance Aruba Resort & Casino y Wind Creek Hospitality ta desea henter pueblo di Aruba un feliz aña 2018!