Rekonosementu pa servisio ekselente!

WILLEMSTAD –  Un di e filosofianan ku ta kore manera un liña kòrá den e kompania ta, ku si pèrkurá pa bienestar di e koleganan, nan lo pèrkurá pa esun di e huéspetnan. Esaki ta un di e prinsipionan di Renaissance Curaçao Resort ku ta bin bèk den tur akshon òf esfuerso pa empleadonan i komunidat. J. Willard Marriott a inkulká esaki for di un prinsipio den koleganan di e kadena hotelero Marriott. E ‘Spirit to Serve Award’ ta rekonosé koleganan ku tabatin un prestashon ekstraordinario i a duna servisio ekselente na huéspetnan di e resort.

Maneho di Renaissance Curaçao Resort i empleadonan tin komo meta pa tur dia di nobo ofresé un servisio ekselente na huéspetnan. Ku ta rekonosé empleadonan mester meramente sirbi komo un estímulo pa kontinuá ku e tremendo trabou ku nan a bin ta hasi tur dia pa surpasá espektativanan di kada huéspet. “Diferente empleado di Renaissance Curaçao Resort a risibí un ‘Spirit to Serve Award’, nos ta kere ta masha importante pa sigui motivá nan pa keda ofresé un servisio di kalidat haltu. Nos servisio ta keda distinguí dor di un aserkamentu personal na kada huéspet, aki nos ta pensa riba antisipá nan deseonan, surpasá espektativanan riba tur nivel i ora ta nesesario bai e mia èkstra tambe. E ‘Spirit to Serve Award’ ta fit den nos liña di maneho i filosofia komo kompania; nos ta kere firmemente ku nos empleadonan ta nos kapital di mas grandi i ta na su lugar pa yama kada un kolega danki pa nan trabou di tur dia!”, esaki di akuerdo ku sra. Maylin Trenidad, Gerente General di Renaissance Curaçao Resort.

E rekonosementu spesial a keda selebrá den Atrium, aki e empleadonan sobresaliente a risibí nan ‘Spirit to Serve Award’ i un karta di sr. Bill Marriott for di man di sra. Maylin Trenidad i sr. Angelo Martes, Direktor di Rekurso Humano. Un pabien ta bai na Alvin Henry (Bell Desk), Alexis Jake (Bell Desk), Christoph Pötsch (Kitchen), Herbert Castillo (Management.), Jennifer Trenidad (Guest Experience) i Clement Isaacs (Food and Beverage). Nan tur seis a risibí e ‘Spirit to Serve Award’ i ta kompartí esaki ku nan koleganan. Di akuerdo ku sra. Maylin Trenidad ademas di un espíritu di servisio i ekselensia na Renaissance Curaçao Resort ta enkurashá un espíritu di ekipo. Huntu, nos tur ta logra mas. Masha pabien!