…Djasabra 28 di Desèmber próksimo…
WILLEMSTAD – Djasabra 28 di Desèmber próksimo Renaissance Mall & Rif Fort i Carnaval Casino lo selebrá e gran final di e kampaña di fin di aña ‘Island Extravaganza’ ku un evento espektakular. Kuminsando for di 3’or di atardi te 10’or di anochi un i tur ta keda invitá pa forma parti di aktividatnan variá kombiná ku e rifa di e grandioso premionan di ‘Island Extravaganza’. Lo kuminsá e atardi festivo ku un bazar; ‘Xtravagant New Years Fair’ dediká na elegansia i brio di selebrashon di fin di aña. Durante e bazar lo konta ku ofertanan spesial riba entre otro servisionan di Spa, shampaña i hopi mas. Ademas di esaki lo tin stènt di kos di boka dushi tambe. Pa duna e evento un toke familiar lo tin Bouncers pa muchanan for di entre 3’or i 6’or di atardi. Tambe muchanan lo por disfrutá di e Arts & Crafts Corner di Crea Bea entre 3’or i 4’or. Durante di dia lo tin ambiente, baile i músika kuminsando ku presentashon di grupo di salsa, Salsation di 6:00pm te 6:30pm siguí pa Son CC di 6:30pm pa 7:30pm i despues pa Big Band ku presentashon di Hendrick de Windt, Farley Lourens, Andrew Aalse, Clinton Hato i Riggwenda Doorje for di 7:30pm te 8:30pm i na klousura di e selebrashon lo tin presentashon di D’Edge Band den Rif Fort. Ta bon pa menshona ku durante hinter dia lo tin entretenimentu musikal presentá dor di DJ Ro-1. 
Bishitantenan di Carnaval Casino tambe lo selebrá klousura di ‘Island Extravaganza’ ku entre otro un tremendo Bingo ku premionan spesial entre 2’or i 4’or di atardi i mas anochi lo tin presentashon di Rhydd’m esaki for di 10:00pm te ku 2:00am. Ademas di esaki Carnaval Casino lo repartí dòbel kupòn entre 4:oopm ku 7:00pm. E final di ‘Island Extravaganza’ lo konta ku vários premio atraktivo ku lo por wòrdu ganá dor di tur ku a depositá nan kupòn. E premio grandi kual ta e Kia Sportage 2014 Full Equipped lo wòrdu rifá 9:00pm. Tur ku a depositá nan kupòn mester ta presente ku identifikashon bálido durante rifa. Bin forma parti di e klousura di ‘Island Extravaganza’ djasabra 28 di Desèmber próksimo for di 3:00pm te 10:00pm.