Renaissance Curaçao Resort a ‘showcase’ nan fasilidatnan pa reunion i evento:

WILLEMSTAD:- Djaweps último Renaissance Curaçao Resort a tene su ‘Renaissance Meeting Experience’. E enkuentro sosial a konta ku partisipashon di diferente empresa lokal ku anualmente ta hasi uzo di e fasilidatnan di Renaissance Curaçao Resort pa selebrashon di fin di aña, diferente reunion òf eventonan. E ‘Renaissance Meeting Experience’ tabata un momento perfekto pa pone lus riba diferente fasilidat pa reunion i evento, servisio i lokalidatnan ku Renaissance Curaçao Resort tin pa ofresé entre otro na klientenan empresarial. A duna inisio na e enkuentro ku un kòktel na Infinity Beach, na mes momentu a demostrá na tur presente e opshonnan ku ta eksistí pa un enkuentro di empleado, resepshon di kompania i otro enkuentronan sosial na playa eksklusivo di Renaissance. Despues di esaki a kontinuá Atrium ku e ‘highlight’ di e ‘Renaissance Meeting Experience’, ku ta e ‘tasting’ di e menú di fin di aña ku Renaissance Curaçao Resort lo presentá pa e temporada 2013 “Anualmente nos klientenan ta masha entusiasmá ku e oportunidat ku nos ta duna nan pa saboriá for di e menú di fin di aña. E aña aki no tabata un eksepshon, nos a tuma nota di hopi kara kontentu”, esaki di akuerdo ku Sra. Maritza Molina, direktora di merkadeo pa Renaissance Curaçao Resort. Despues di e ‘tasting’ tur esnan presente a wòrdu invitá pa e ‘foyer’  dilanti e Ballroom na unda ku por a disfrutá di un variashon grandi di ‘dessert’ i kos di boka dushi. Aparte di esaki Renaissance Curaçao ta ofresé tambe otro fasilidatnan manera e Riffort Wall ku bista espektakular riba Willemstad of laman i e Ocean Front Park i Fountain Plaza. Tur e lokalidat menshoná ta ideal tambe pa un sena, resepshon, fiesta di kasamentu òf selebrashon di hasimentu di aña òf aniversario. Manera ta e kaso tur aña, prensa lokal tambe a wòrdu invitá pa eksperensiá e ‘Renaissance Meeting Experience’ huntu ku demas invitado empresarial. Riba fotonan athuntu por haña un impreshon di e evento ku a tuma lugar djaweps último na Renaissance Curaçao Resort, Infinity Beach  Atrium i den  Ballroom.