WILLEMSTAD- Ofisina di Centraal Bureau voor de Statistiek (CBS) a kondusi un Business Census riba enkargo di Ministerio di Desaroyo Ekonómiko. E resultadonan di e Business Census aki ta konosí i nan ta disponibel riba e pagina wèb di Business Census.

E Business Census a keda kondusí primordialmente ku e meta pa kolektá informashon aktual i relevante tokante di empresanan profit i non-profit na Kòrsou. Disponé di informashon aktualisá ta di vital importansia pa desaroyo di maneho. E resultadonan di e Business Census ta duna nos un bista den e nesesidatnan spesífiko riba tereno ekonómiko i finansiero den mundu empresarial na Kòrsou.

Entrante awe e reportahe ku e resultadonan di e último Business Census ta disponibel riba e pagina wèb di Business Census Curacao (www.Businesscensus.cw). Tambe e pagina di Facebook di Business Census lo wòrdu aktualisá semanalmente durante e 2 lunanan benidero. Riba e pagina aki un i tur lo por haña informashon tokante entre otro e tipo di empresanan na Kòrsou (empresanan micro, chikí, mediano i grandi), kantidat di eksportashon, situashon finansiero di e empresanan i muchu mas.

Aparte di e pagina ofisial di Business Census pueblo lo por akudí dentro di poko riba e pagina wèb di CBS tambe na unda e resultadonan lo keda publiká.

Tipo di informashon i datos manera esnan optené pa medio di e Business Census lo mester wòrdu usá den nan totalidat den kombinashon ku e kapasidat, kompetensia i ideanan di nos hendenan si akaso ku Kòrsou lo ke profila su mes komo un ekonomia di konosementu; esaki ta loke e rekomendashonnan di e Business Census ta bisa. Aparte di e rekomendashon aki e Business Census ta indiká tambe ku empresanan micro lo mester risibi e sosten nesesario pa esakinan por krese mas i ku hóbennan lo mester keda

entrená pa e empleonan ku tin mas nesesidat di dje na Kòrsou. E énfasis mester ta pa optené kada bes mas konosementu atraves di teknología desaroyá òf adoptá, pero tambe pa atrae mas ’human capital’ kapas i talentoso ku lo por duna un kontribushon balioso na e ekonomia di Kòrsou.