WILLEMSTAD – Unikamente si logra pone ekonomia move atrobe, komunidat di Kòrsou lo por brinda alivio pa e kantidat di reto ku e pais outónomo ta konfrontando. Ta p’esei e asosiashon di bankero di Kòrsou CBA ke enkurashá tantu gobièrnu komo sektor komersial pa skohe e ruta ei.

E direktiva nobo di CBA ku a kaba di sinta ta enkabesá pa presidente Leo Rigaud (Vidanova Bank), vise presidente Chicu Capriles (Maduro & Curiel’s Bank) i tesorero Kenny Canword (Orco Bank). Na momento ku nan a sinta nan a evaluá estado di ekonomia. E echo ku e ekonomia ta sigui krekeché i e aña aki atrobe lo no mustra un kresementu, ta prekupá e bankeronan. E banko i fondonan di penshun tin e medionan pa por finansiá proyekto nobo ku por duna nos ekonomia e impulso nesesario, pareu ku nan bini riba mesa. Nan ta animá gobièrnu pa kontinuá ku e sistema aselerá pa duna e pèrmitnan rekerí. Alentador ta en kaso e areglo ku Damen (pa dòk), e mega pir den fase di konstrukshon, e mehoramentunan na aeropuerto i e inisiative pa un planta di gas LNG. Sinembargo, e situashon na nos pais bisiña Venezuela ta keda tin un efekto negativo serka nos, riba rafinahe di petroli, nos turismo i Insel Air.

CBCS

Ademas CBA ta urgi pa restablesé trankilidat den i rondó di Banko Central pa Kòrsou i Sint Maarten (CBCS). Ta sumamente lamentabel ku e órgano di supervishon a bira tópiko di diskushon públiko, pasobra esei ta duna un señal eróneo. Ta di spera ku Banko Sentral ta retorná den un ambiente mas trankil; esei no ta kumbiní e bankeronan so, pero tur hende.

Sint Maarten

Meskos ku tur hende na Kòrsou CBA tambe ta konbibí ku poblashon di Sint Maarten en general i e empleadonan di su miembronan na Sint Maarten mas en partikular. E estrago na Sint Maarten komo konsekuensia di orkan Irma lo tin su impakto tambe riba Kòrsou, ya ku Kòrsou i Sint Maarten ta den un union monetario. Aparte di e ekonomia krekeché di Kòrsou, awor ekonomia di Sint Maarten tambe ta haña un tremendo impakto pa atendé kuné. Den un tiru e perspektivanan positivo, na bispu di e temporada haltu nobo di turismo, a disparsé. Awor mester mara huntu pa rekuperá e daño enorme promé ku por pensa atrobe riba kresementu di ekonomia di Sint Maarten.