Paso ta habri kaminda pa impulso nobo na turismo di Kòrsou

WILLEMSTAD – Djasabra Rif Resort Hotel NV (Rif Resort) komo doño a firma un akuerdo ku Piscamar Beach Resort di Grupo Orco pa bende e edifisio kaminda Curaçao Marriott Beach Hotel & Emerald Casino ta situá. E doño nobo a komprometé pa banda di e kompra hinka US$ 33,7 mion den un renovashon riguroso i pa ekspandé e kambernan di hotèl. E paso aki ta habri kaminda pa un impulso nobo na turismo di Kòrsou. Marriott ta keda mará na e hotèl ora e habri bèk despues di e renovashon. Ayera mainta komo promé a informá e personal.

Fin di 2014 Rif Resort a kuminsá e trámite pa bende e edifisio hotelero na Parasasa ku e meta pa haña un invershonista ku por logra un mihó posishon pa e hotèl den e kuadro mas amplio di Kòrsou su turismo, ku ta enserá un upgrade di e produkto turístiko di Kòrsou. Asina ta logra tambe pa sigurá e empleo riba término largu, loke no por bou di e sirkunstansianan aktual. Pa e proseso di benta a kontratá e makelar eksperensiá di hotèl na Merka, Ackman Ziff. Esei a lansa un kampaña internashonal di benta, kaminda interesadonan lokal tambe por a partisipá. Den e konteksto ei tabatin kontakto ku mas ku 90 potensial kumpradó. Finalmente a sobra 3 ku por a hasi un presentashon di nan plannan ku e hotèl. Na último ora un di nan a hala bèk. Ku e ekspertonan a evaluá e oferta, plan i presentashonnan di e kandidatonan ku a sobra. E loke nan a ofresé na suma pa kumpra e hotèl no tabata diferensiá hopi, pero Grupo Orco a bin ku un plan ekstenso pa mehorá e hotèl ku hasta a bai mas leu ku loke Marriott a usa komo punto di salida i konsekuentemente ku un invershon mas grandi. A base di esei a denominá Grupo Orco komo preferred negotiation partner.

Negosiashonnan

Na kuminsamentu di mei e aña aki e negosiashonnan ku Orco a start pa kua tabatin términonan di tempu bon deliniá pa e diferente fasenan. Ora e investigashon ku Grupo Orco a laga hasi pa sa estado eksakto di e edifisio a duna un resultado positivo, e negosiashonnan a sigui. Esei a desemboká dia 28 di yüli último den un akuerdo. Despues a sigui traha riba e diferente kondishonnan sekundario, manera un franchise agreement entre e doño nobo ku Marriott International, preparashon di e plan sosial, etc. Ayera Rif Resort Hotel N.V. i Piscamar Beach Resort N.V. a firma e APA (Asset & Purchase Agreement).

Ekspanshon

Grupo Orco a komprometé pa kumpra e hotèl i pa invertí minimalmente 33.7 mion dòler den un renovashon grandi. Nan ke agregá un piso i oumentá e kantidat di kamber te mas ku 324. E karakter drástiko di un ke otro ta hasi ku e hotèl no por keda habrí.

Mientrastantu Marriott a forma algun task force pa prepará pa ora stòp operashon di e hotèl djis despues di e Curaçao North Sea Jazz Festival. Rif Resort komo dunadó di trabou pa e empleadonan di Marriott hotèl a palabrá pa Marriott atendé ku kada un di e empleadonan den e dianan binidero. Pa guia e empleadonan lo organisá merkadonan di empleo ku CHATA i SOAW pa wak ken nan por yuda ku un trabou nobo den e sektor di turismo di Kòrsou òf den otro sektor. Grupo Orco a kumbiní ku Marriott International pa e hotèl keda karga e nòmber di Marriott despues di e renovashon ku lo dura alrededor di un aña i mei. Na e re-apertura e doño nobo ta determiná si i ken di e èks empleadonan e ta ofresé un trabou atrobe na e hotèl.