ORANJESTAD, Aruba: Recientemente Aruba Leo Club y Aruba Lions Club a instala nan directiva nobo pa e aña Leonistico cu a inicia na luna di juli. E evento a tuma luga durante un “brunch” na Alhambra Ballroom. Varios representante di otro clubnan di servicio tabata presente pa testigo di e ceremonia special aki. E directiva nobo di Aruba Leo Club ta consisti awor di Roderick Tapia como Presidente, Kellsy Giel como Presidente saliente, Josue Arbona como Vice Presidente, Zinnia Jacobs como Secretaria, Kristine Ruiz comoTesorero, Frankjesca Inacio como “Tailtwister” y Keyla Giel como “Director”. Na mes momento a instala tambe e directiva nobo di Aruba Lions Club cu ta consisti di Francis Leo cu a keda eligi como Presidente, Edwin Tromp como Presidente saliente, Theo Kock como prome Vice Presidente, Gerardo Figaroa como di dos Vice Presidente, Kenneth Luidens como di tres Vice Presidente, Ronald Laclé como Secretario, Roccini Anthony como Tesorero, George Simon como “Lion Tamer”, Patrick Paskel como “Tailtwister”, Randolf Vrolijk y Gigi Helder como Director 2 aña, Jaime Laclé y Omar Tromp como Director 1 aña, Ronny Nicolaas como Director di Miembresia y Orlando Quandt como “Leo Advisor”. Tanto e Presidente di Aruba Leo Club como esun di Aruba Lions Club a hiba palabra despues di nan instalacion, den cual a señala e plannan cu nan tin pa cu nan respectivo clubnan pa e aña Leonistico cu apenas a inicia. E tema di e aña aki ta Strengthen the Pride (Fortalece e Grupo) di cual lo enfoca riba e siguiente cinco puntonan: sigui subi productividad di Lions Club pa comunidad, rebiba e “core businesses” di Lions club, crea negoshinan y actividadnan nobo, mas atencion riba e miembronan y restructuracion di e club. Lions Club International ta representa riba 1.4 miyon miembro parti den mas cu 46 mil club rond mundo den 205 pais of areanan geografico. Aruba Lions Club ta un club di servicio cu ta existi pa 67 aña caba y ta bon conoci riba nos isla pa su forma activo di yuda cu proyectonan pa comunidad. E ta conta cu 51 miembro y ta resorta bou di districto E1, cual districto ta cubri e area regional Aruba, Boneiro, Corsou, y estadonan Venezolano manera Falcon, Zulia, Trujillo, Merida, Tachira y e cono pabou di estado Apure. Anualmente Aruba Lions Club ta genera fondonan danki na diferente eventonan cu ta organisa, di cual e placa ta bay bek den comunidad a traves di un lista largo di organisacion y instancianan den necesidad.