Djadumingu último den un sala yen yen na University of Curaçao, 4 skol a kompetí pa e título “Mihó tim di kalkulashon di Kòrsou”. Den un final hopi eksitante ku a keda transmiti bibu na televishon, Römer school a resultá e ganadó. Kompañá ku aplouso grandi di kompañeronan di klas i mayornan, e 12 alumnonan di e tim di kalkulashon di Römerschool a risibí e premio mayó di 5.000,00 florin di ENNIA, siguí pa  Johan van Walbeeckschool, Sint Franciscus College i Coromoto College na di dos, di tres i di kuater lugá. Pa kada mucha tabatin un medaya bon meresí i e honor i plaser pa representá nan mes skol den e tremendo kues nashonal Tur Ta Konta.

Kompetensha nobo di kalkulashon individual.

Anteriormente Himnish Sukhnani di Römer School a gana e promé premio den e kompetensha di kalkulashon individual pa e 50 alumnonan mas fuerte den kalkulashon na Kòrsou. Esaki a pone ku Römer School a bira un dòbel ganadó.  E kompetensha individual akí ta un parti nobo di e kues nashonal Tur Ta Konta. E ta tene tur skol ku kai afó den e ròntnan eliminatorio tòg enbolbí, ya ku kada skol por manda su mihó kalkuladónan pa partisipá na e kues individual. Dosente Carine Evertsz di Römer School ta sumamente orguyoso di Himnisch i hinter su tim di kalkulashon: “Nos a prepará di un manera relahá pa e kues akí i no a pone preshon  riba e alumnonan. Usando nos métodonan di kalkulashon tur materia tabata konosí kaba, i nos a skohe e 12 kalkuladónan  ku tabata mihó i mas motivá pa e kues. E echo ku nos a gana e kompetensha individual i tambe e kompetensha di tim ta tremendo pa nos skol, pero prinsipalmente pa e alumnonan e ta un bunita eksperiensha mas.”

Atenshon pa alumnonan fuerte i suak.

E kues di kalkulashon nashonal kisas ta e aktividat mas konosí di Fundashon Tur Ta Konta, pero e fundashon ta hasi mas ku esaki. E no ta solamente pone alumnonan bon den kalkulashon den spòtlait, pero tambe ta yuda netamente e alumnonan suak progresá. For di su komienso, vários shen mucha por a haña èkstra lès di kalkulashon. Boluntarionan  den mundu empresarial ku por konta bon i ku ke pasa nan konosmentu pa hubentut, via Tur Ta Konta ta tuma alumnonan suak bou di nan enkargo i komo tutor ta duna nan èkstra lès por lo ménos un bia pa siman na skol.  Nan ta agradesido i ta sinti nan mes inspirá pa yuda e alumnonan,  i hopi bia e alumnonan ta progresá lihé. E atenshon personal di e tutor ta pone ku e alumno su outoestima ta oumentá i nan ta haña mas gana di siña.

Konstruí un nashon fuerte

Pa nan por kumpli ku tur pedido, direktiva di e fundashon ke oumentá e kantidat di tutor i e kantidat di skol ku nan por yuda. Kalkulashon ta krusial pa desaroyo di tur mucha, pero tambe pa adelanto di nos komunidat. Un bon kalkuladó tin chèns riba miho trabou i mihó pago. Ademas muchanan ku por kalkulá bon tin mas chèns pa bai studia i mas chèns pa despues dirigí nan propio kompania di forma eksitoso. Gilbert Martina, CEO di ENNIA i spònser di e premio mayó ta formulá esaki di un forma bunita, ora e ta splika dikon for di un komienso kaba ENNIA ta spònser e kues di kalkulashon í lo sigui spònser e den futuro: ‘The main hope of a nation lies in the proper education of its youth, i ku e kues edukativo eksitante  akí nos por ta orguyoso di nos hubentut!’.