WILLEMSTAD – Komo regalo, Ronald McDonald Family Room a haña un donashon bunita di organisashon Noach Kapel di Marine Basis Parera. Bou di maneho di A.J.H. van Vilsteren i J. Wojcik, e organisashon a logra rekoudá Nafl.4,900 entre ougùstùs 2014 i desèmber 2014. Ku e sèn ku a keda rekoudá, a kumpra un “dryer” pa e Family Room i tambe a kubri tur e gastunan pa transportá i instalá e “dryer”. E voluntarionan di e Family Room no mester wòri mas ku labamentu di paña di e famianan ku tin un yu malu den e departamentu di mucha na SEHOS. Di parti di Ronald McDonald House Charities Curacao Foundation, nos ke yama danki na tur hende ku a kontribuí den e donashon aki.

Tokante RMHCC:

E fondo rekoudá ta permití pa kontinuá ku e trabounan den RMHC Family Room i tambe yuda desaroyá inisiativanan importante ku lo benefisiá nos komunidat i espesialmente nos muchanan. For di su establesementu aki na Kòrsou RMHC a sòru pa identifiká, desaroyá i traha riba proyektonan ku ta apoyá programanan ku ta direktamente konektá ku salu hubenil riba tèrmino largu. Ku e Family Room , RMHC Curacao Foundation a sa di yuda mas di 5200 famia y mucha na Kòrsou ofresiendo nan no solamente un área di rekreashon konfortabel na muchanan interná den hospital pero tambe ta brinda mayornan i famianan di muchanan aki un kamber konfortabel pa hospedá den dje ya ta serka di nan yu.