WILLEMSTAD- 30 di yüni, Rotaract Club of Curacao a entregá Ronald McDonald House Charities Curacao Foundation (RMHCC)  un cheque di ANG 18,223.42. E montante aki a keda rekoudá pa medio di  Finding Dory Premier ku e Rotaract Club of Curacao a organisá.

Rotaract Club of Curaçao ta un klup di servisio pa hóbennan entre 18-32 aña ku a tuma kontakto ku RMHCC pa organisá Finding Dory premier pa di e forma aki rekoudá fondo pa nan ‘family room’ nobo na e Hospital nobo. “Tabata un honor pa nos por a traha ku RMHCC ku e evento aki anto Rotaract Club of Curacao no por ta mas felis ku e presentashon di e cheque aki na RMHCC. No solamente nos ta kontribuyendo i kreando un impakto grandi den nos komunidat, pero tambe, nos ta siñando hopi i formando amistatnan importante i valioso na kaminda. Maske nos a organisá e evento aki, nos lo no ta por a logra  tur loke nos a hasi sin e yudansa di RMHCC, asina nos ta wak ku nos por logra hopi mas kos si nos traha huntu ku otro.” asina Hannah Petit, presidente of the Rotaract Club of Curaçao a splika nos.  

RMHCC su programa na Sint Elisabeth Hospital ta trese stabilidat i rekurso na famianan durante di tempu difísil. E programa ta duna muchanan i nan famia e tempu i atenshon ku nan mester pa rehabilitá i pasa tempu ku otro. “Nos ta hopi gradisí na Rotaract Club of Curaçao pa por a yuda nos ku voluntarionan, pero tambe ku e evento di Finding Dory ku e rekoudá ANG 18,223.42. E reakshonnan ku nos a risibí despues di e premier tabata hopi apresiá i nos no por duna danki sufisiente na Rotaract pa a organisá asina un evento eksitoso.” esaki ta di akuerdo di  Claudia Rigaud, Executive Director of the Ronald McDonald House Charities Curaçao Foundation.

E Finding Dory premier a tuma lugá na The Cinemas Curaçao riba un djaweps 16 di Yüni anto tur 425 ticket a keda bendí den 2 dia! Na e evento aki, muchanan tabata tin e oportunidat pa saka potrèt ku un ‘life-size’ Dory i tambe un Finding Dory frame. Tambe tabata tin un raffel kaminda por a gana un pintura di Finding Dory ku a wòrdu traha dor di Herta Parabirsing-Balentina. E motibu di e fundraiser aki tabata pa rekoudá fondo pa RMHCC su Family Room. Tur e ANG 18,223.41 ku a wòrdu rekoudá pa medio di e evento aki ta bai pa RMHCC, ku speransa ku por krea un ambiente higiéniko, saludabel i tambe sigur pa e muchanan na HNO.

Tur e trabou aki no por a wòrdu kumpli sin nan spònser: FCW Legal, ORCO Bank, CHB, Tramm, Coca Cola, Jonckheer Advertising, The Cinemas Curaçao, Diamonds, Curaçao Office Supply, Gewi, Fundashon Duna ta Biba, Seulai Ng, Mina de Haak,  Varuska Martins Pereira i Cake Dreams.