Mas di 20 pelíkula informativo lo konta orígen, kultura i historia di diferente tipo di muzik di Karibe durante e festival di sine Muestra Caribe 2014 na Teatro Luna Blou. Di 24 pa 29 di novèmber próksimo públiko tin e oportunidat di mira dokumentalnan di diferente pais di Karibe i disfrutá di charlanan i presentashon di músikonan lokal. Pasombra no por ninga ku muzik di nos region karibense ta e inspirashon prinsipal di músika popular i baliabel aki na Kòrsou. Lo tin funshon tantu na La Tentashon, den Artic Lounge – ku ta situá banda di La Tentashon – komo den sala di Teatro Luna Blou. Ta di seis biaha ku Kòrsou por disfrutá di Festival Muestra Caribe. E sineasta Kubano Rigoberto Lopez a inisiá e festival aki ku e meta pa públiko Karibense tuma nota di pelíkulanan ku ta keda produsí den nos region ku kasi semper ta keda solamente pa konsumo lokal. Esaki ta un manera pa trese mas interkambio kultural. Durante bishita di direktor di Teatro Luna Blou Segni Bernardina na un konferensha di Instituto Cubano del Arte e Industria Cinematográficos na Cuba , el a firma un akuerdo ku e organisashon Muestra Caribe pa organisá e siguiente muestra i selekshon di pelíkulanan aki na Kòrsou. Tambe a firma un akuerdo di koperashon pa kuminsando na aña 2015 kuminsá ku formashon i interkambio entre profeshonalnan den mundu di sine i organisashon di un foro aki na Kòrsou. E aña aki Kòrsou lo ta den ambiente di músika durante seis dia durante e festival. Kada dia lo tin un ritmo o pais komo punto di salida. Riba kada dia por mira dos dokumental amplio i algun mas kòrtiku al respekto. Pa kada dia lo invitá un artista lokal ku lo konta, di ki manera e ritmo ei a inspir’é i lo presentá algun kansion. Pues despues di a wak algun dokumental por interkambiá ku otronan gosando di muzik i algu di bebe na Terasa di Luna Blou. Djaluna 24 di novèmber lo ta nos Noche Cubano, djamars 25 Soca Calypso Night, djarason 26 lo ta Nuit de Haiti / Kompa, djaweps 27 ta nos Noche Latino i djabièrnè 28 ta Reggae Night. Djasabra 29 di novèmber ta dediká na henter famia ku dokumentalnan speshal pa mucha. Pa esnan ku no ke skohe i ke bishita tur 5 anochi den siman por kumpra Passe- partout pa solamente 25,00 florin na takia di Luna Blou. Karchi pa kada anochi di e festival ta kosta 10 florin. E dia di famia speshal pa mucha djasabra ta kosta 7,50.