WILLEMSTAD.- Despues ku seis grupo di Karnaval, Grupo Globo, Estreno di Pikete, Atanan-Deluxe, Le Presige, Crazy Diamonds i Viva a tuma e inisiativa pa organisá un Jump In pa rekoudá fondo pa por partisipá na Karnaval 2014 nan a aserka Licores Maduro. Ayera a tuma lugá e rueda di prensa pa e evento aki den kual prensa a haña informashon detayá di e jump in. Licores Maduro, siendo un dje kompanianan ku semper a aportá na aktividatnan karnavalesko a honra e petishon i duna su aporte total pa yuda realisá e proyekto. E ‘Mega Valentine’s Jump In lo tuma lugá dia, 14 di febrüari próksimo (Dia di San Valentino), den kura di Licores Maduro na Dokweg, Nieuwe Haven; kuminsando pa 8’or di anochi te ku 1’or di mardugá. Animashon musikal lo ta na enkargo di Gio Fuertisimo, Era i Dreams ku den nan fila, Hunneley Felicia. Entrada ta 60 florin i ta inkluí bibida (All In). Karchi entrada ta optenibel serka e miembronan di e gruponan i tambe na Licores Maduros. Lo tin vigilansia pa outo. Mega Valentine’s Jump In, un jump in kaminda ambiente lo ta garantisá ku e presentashon di e tres bandanan mas popular di Kòrsou. Licores Maduro, konsiente di su ròl komo un dje kompanianan lider den nos komunidat lo keda aportá na nos fiesta kultural di mas grandi den tur sentido tanten ku esaki ta na su alkanse. Licores Maduro  i Dewar’s White Label ta duna su aporte tambe na Festival di Tumba, na AGKK, tambe na otro gruponan partisipante na Gran Marcha, na jump in di otro gruponan,  i tur esaki pa asina yuda garantisá kontinuidat di nos Karnaval. Ban sostené nos gruponan di Karnaval kumprando bo karchi di entrada pa e ‘Mega Valentine’s Jump In’. Potret drpd: Cherrel (Le Prestige), Djuric (Atanan Deluxe), Orlando (Globo), Monique (Crazy Diamonds), Gino (Viva), Andy (Estreno)