E grupo “Run for your Heart” ta consisti di persona di diferente edad y trabou pero tur ta comparti e pasion pa e deporte di core. En conexion cu e ‘Dia Mundial di Curason’ a entrevista dr. Cheng, sra. Monique van Embden y sr. Koos Veel, tur tres ta practica e deporte di coremento y ta splica e beneficio di esaki.
Dokter Johnny Cheng ta un cardiologo di profesion ta splica e importancia cu practica deporte of haci movecion combina cu come saludabel tin pa preveni malesanan cardiovascular.
Dr. Cheng ta conta cu den su praktijk e ta haya hopi caso di personanan cu tin malesa cardiovascular caba, pero cu despues di nan diagnostico ta cambia nan estilo di bida drasticamente y ta cuminsa haci actividad fisico, por ehempel cana of core.
Dr. Cheng, cu ta un coredo y ta participa na caredanan tin algun di su trofeo y medaya den su oficina pa asina encurasha y stimula su patientnan pa tambe ta activo y di tal forma reduci e riesgonan y complicacion di enfermedad cardiovascular .
Na Aruba e porcentahe di personanan cu tin obesidad, colesterol y presion ta halto. Como tal e pome causa di morto na Aruba ta debi na malesanan cardiovascular, mescos cu mundialmente esaki ta reclama mas bida cu cualkier otro malesa cronico na mundo.
Dr. Cheng ta di opinion cu e ultimo añanan e pueblo di Aruba a cuminsa cana mas y haci mas deporte. Esey ta obvio riba Linear Park, cu despues di un inversion den e infrastructura, esaki ta duna su fruta y cu hende ta haci bon uzo di dje.
Sra. Monique van Embden, Directora di Instituto Biba Saludabel y Activo (IBiSA) a expresa cu e ta haya importante pa e mes demostra cu e no ta djis papia di un estilo di bida saludabel y activo, pero cu e ta aplica esaki personalmente tambe. E ta kere cu e meta di IBiSA ta trata di hiba esey pa pueblo na diferente manera. Sra Monique van Embden ta forma parti di e grupo ‘Run for your Heart’. E ta conta cu un paar di aña atras e no por a core 1 km y awo e ta na caminda pa su di dos marathon (42K).
“Importante ta pa haci por lo menos 30 minuut di actividad fisico pa dia”. E tipo di actividad fisico y e intensidad ta varia pa persona, edad y capacidad. Por considera di haci e hunto cu otro persona, sea den famia, amistad of di trabao, pa asina tin un apoyo pa continua cu e routine y cu e 30 minuut di movecion ta bira parti di nos bida diario. Dr. Koos Veel ta invita tur persona pa core, cu ta interesa pa afilia na e grupo “Run for your Heart”. “Nos ta un grupo hopi mezcla y fuera cu nos ta train duro, nos ta pasa hopi bon hunto tambe!” Dr. Veel a bisa cu un sonrisa grandi. Pa esnan cu ta interesa pa join e grupo y ta desea mas informacion, por tuma contacto cu su persona na tel: 7390000.