-WILLEMSTAD- Dianan 15 i 16 di ougùstùs, un biaha mas Stichting Julius Leeft!, bou di direkshon i guia dinámiko i inkansabel di e konosido JOHN LEERDAM, ta presentá e monólogo teatral SAIDA den Teatro Luna Blou. Aktuashon estelar ta den man di e aktris yu di Kòrsou bibá na Hulanda PAULETTE SMIT, bou di direkshon artístiko di John Leerdam. Manera ta kustumber nos por spera otro obra teatral espektakular dirigí pa John Leerdam, ku lo deleitá e mundu di amantenan di bon teater na Kòrsou.
Paulette Smit, ku a studia na Stella Adler Conservatory in Acting i ku tin un trayektoria di aktuashon teatral konsiderabel riba su nòmber, e biaha akí ta interpretá papel di un mama kurasoleño inventivo, fuerte, sentimental i ku sentido di humor. E ta un seduktora di eksperiensia ku ta brua tur hende hòmber su kabes? Of mas bien e ta víktima di e machismo di su propio kasá?
Morto repentino di su kasá ta kambia Saida su bida drastikamente i ta pon’é dilanti di hopi dilema. Saida lo tin ku sigui lucha den un bida kaminda manipulashon i sedukshon ta yud’é sigurá su yunan i e mes un futuro.
SAIDA ke visualisá e historia no papiá di e mama soltera, trese dilanti e responsabilidat di tantu mama ku tatanan, pero ariba tur kos e ke duna e mensahe di AMOR. E amor ku ta vense.
Fuente di inspirashon pa e forma eséniko di e monólogo teatral SAIDA akí, ta e pelíkulanan di Hitchkok i
‘film noir’, ku ta eksponé e hende muhé den su ròl di ‘femme fatale’. Semehantemente den SAIDA énfasis ta kai riba e tragedia di un mama soltera i su afan pa sobrebibí ku ta klèsh ku su deseo pa tin un matriomonio perfekto.
John Leerdam a studia pa Direktor di Teater i pa dosente Drama na Amsterdamse Theaterschool. Despues el a optené su Master in Fine Arts na Colombia University na New York. Di 1996 te ku 2003 e tabata direktor i lider artístiko di Cosmic Theater na Amsterdam. Djei destino a hib’é riba e rumbo polítiko i te ku 2012 el a fungi komo Miembro di Tweede Kamer pa Partij van de Arbeid. For di 2005 e ta e motor dinámiko tras di Fundashon Julius Leeft! E fundashon akí a bira renombrá pa su presentashonnan impreshonante teatral-musikal ku temanan ku ta trata puntonan doloroso den historia di Hulanda, e bida entre diferente kultura, rasismo skondí, machismo, inhustisia i identidat.
Paulette Smit a skirbi i ta aktua e teksto di SAIDA. For di 2006 e ta koordinadó artístiko, aktris, outor/guionista i miembro di staf di Fundashon Julius Leeft! Na 2001 el a risibí e Cosmic Award pa balentía artístiko i atenshon kultural pa e komunidat multikultural i na 2006 el a keda kondekorá komo Ridder den Orden di Oranje-Nassau, meskos ku John Leerdam, pa su méritonan denter di sektor kultural.
Despues di e estreno i siguiente presentashonnan na Hulanda, Saida a destaká komo un obra teatral impaktante ku a pone tantu hende muhé komo hende hòmber pensa i hasi hopi pregunta.
Fundashon Julius Leeft! ta invitá un i tur pa bin wak e obra na Teatro Luna Blou. Karchinan ta optenibel na Teatro Luna Blou, Pompstation St.Maria i Time2Time Saliña na rason di Ang. 35,- mas OB.
Tambe lo duna presentashon i tayernan na hóbennan durante e periodo di 8 pa 22 di ougùstùs, kual lo kulminá den un obra di dansa i teatro riba 22 di ougùstùs pa 5 or di atardi na La Tentashon. Karchinan ta optenibel na rason di Ang. 5,- mas OB na e mesun puntonan di benta ariba menshoná.
Lo tin presentashonnan di e monólogo teatral SAIDA na Sentronan di Bario Wishi / Marchena (17 di ougùstùs) i Montagne (18 di ougùstùs) speshalmente pa e habitantenan di e bario i besindario. Distribushon di e karchinan gratuito lo ser anunsiá pronto pa medio di e medionan di komunikashon eksistente.
Finalmente Fundashon Julius Leeft! lo tene un presentashon final na Avila Hotel dia 23 di ougùstùs. Karchinan ta optenibel na rason di Ang. 50,00 inkluso OB na Avila Hotel.
Pa mas informashon tokante e monólogo teatral SAIDA, preis i puntonan di benta por bishitá nos página di Facebook ‘Stichting Julius Leeft! Caribbean https://www.facebook.com/StichtingJuliusLeeftCaribbean òf wèpsait di Teatro Luna Blou http://www.lunablou.com/