Curaçao International BlueSeas Festival ta kontentu di por anunsia e promé artistanan pa e di 3 edishon ku ta tuma luga djabièrnè 30 i djasabra 31 di mart den kayanan di Pietermaai. E konsierto grátis den kaya nan di Pietermaai ta bèk, ku mas partisipashon di talento hóben dediká na e genero Blues! Riba djabièrnè 30 mart Samantha Fish i Kenny Neal lo mira akshon, mientras, Danielle Nicole i Toronzo Cannon lo aktua djasabra 31di mart. Pronto nos lo anunsia e otro nòmber nan. Nos lo anunsia e programa di aktuashon asina e line-up ta kompleto.
Despues di su eksitoso partisipashon den e promé edishon di BlueSeas den 2016, e guitarista blues-rock Samantha Fish ta regresá den e festival kaminda ku tantu eksito e la partisipá.Despues di e partisipashon ei, e la graba dos disko: Chills & Fever, ku a resultá den tòp 10 di lista musikal di Billboard Blues i e grabashon di studio Belle of the West, ku a sigurá su presensia den e mundu di Blues. E multi-instrumentalista di Swamp-blues, Kenny Neal, nasé na New Orleans i kria den Baton Rouge, ta meskla su roots di Louisiana sin problema ku e finesa di soul di Chicago/Memphis. Ku su tremendo trabou riba guitara, su bos un tiki ronko, ya e la poseshoná su mes entre e grandinan den mundu di Blues. Su disko di 2016, Bloodline, a keda nominá pa Grammy den 2017 den sekshon di Best Contemporary Blues Album i e la gana dos Blues Music Awards pa Best Contemporary Blues Male Artist i Best Contemporary Blues Album.
E kantante/kompositor di blues i bahista, Danielle Nicole a nase na Kansas City, Missouri, i a krese tokando/kantando blues. Na 1984 e la gana, komo promé dama e Blues Music Award, den kategoria Best Instrumentalist, pa su manera kreativo/inventivo di toka baho. Den 2015, despues ku su soul-blues-band, Trampled Under Foot a kibra, su solo disko mas famá Wolf Den a sali. Ta spera ku Su di dos solo album Cry No More, lo sali den febrüari 2018, i lo kontené aktuashon di guitaristanan renombrá manera Kenny Wayne Shepherd i Walter Trout. E karismátiko guitarista/kantante/kompositor di Blues Toronzo Cannon a nase den e “kapital di Blues di mundu” Chicago. Ounke e ta bisa ku artistanan manera Buddy Guy, B.B. King, Jimi Hendrix i Hound Dog Taylor a influenshé, tòg su manera di toka guitara i kanta ta original i outentiko.
Hoy en dia e no por keda for di Chicago Blues Festival i for di 2016 despues di a saka su album The Chicago Way, Cannon ta un di e figuranan internashonal mas kotisá di blues di e siguiente generashon. Curaçao International BlueSeas Festival ta un initiativa di Fundashon Bon Intenshon i produsí pa Mojo Concerts.