WILLEMSTAD – Mayan, djaweps dia 28 di mei 10 or di mainta e portanan di Sambil ta habri pa públiko. Asina ta pone alabes e promé paso pa un tradishon bunita nobo na Kòrsou Un dia despues trai mèrdia tin un seremonia pa invitado ku kòrtamentu di sinta. Gerensia di Sambil ta gradesido na tur den sektor públiko i sektor privá na Kòrsou ku a kontribuí na realisá e proyekto grandi aki den tres aña. For di 28 di mei segun un orario fiho lo tin un variedat na aktividat pa deleitá e públiko ku ta bin hasi kompra di tur edat ofresiendo músika, baila, demonstrashonnan, etc. E oranan di apertura di Sambil Curaçao ta di 10 or di mainta te 9 or di anochi di djaluna te i ku djasabra i riba djadumingu i dianan di fiesta di 12 or di mèrdia pa 8 or di anochi. Sambil a haña koperashon di gobièrnu di Kòrsou, diferente departamentu di gobièrnu i empresanan ku ta brinda servisio i produkto pa logra ku e sentro di kompra kompletamente aire kondishoná por kuminsá risibí su promé klientenan riba 28 di mei. Djaluna atardi Aqualectra a konektá Sambil Curaçao riba e ret di koriente. Esei a sigurá ku nada no ta stroba mas pa e inougurashon tuma lugá riba e dia ei. E empresarionan a hasi tur esfuerso pa pone nan pakus na òrdu. Un siman promé e lugá tabata parse kurú ainda. Spesialmente e último dianan a logra un progreso grandi. E sentro ta haña kada be mas karakter awor ku mas i mas pakus i establesimentu den food court ta haña forma pa aworó nan por presentá di un manera profeshonal na e klientenan. Den e dianan, simannan i lunanan binidero kada be mas pakus lo habri di moda ku e ta keda interesante pa kada bes atrobe bai e sentro di kompra.