Manera ya a bira un tradishon, e aña aki tambe Sanikolas i su pietnan lo hasi un bishita  na Kòrsou. P’esei Fundashon pa Nos Muchanan huntu ku MCB i Lito,  Hucor ku KFC, Subway i Pizza hut i Tele Curacao tur nan spònser nan amigu di Sanikolas ta invitá pueblo di Kòrsou pa bin presensiá e yegada ku e aña aki ta tuma lugá dia 15 di novèmber awor. E aña aki Sanikolas lo ta un biaha mas na Kòrsou ku mas ku 50 Piet. For di 2 aña pasa ku algun piet a pasa den un arko-iris ora nan tabata nabegando pa yega Kòrsou, nan a gusta ku nan koló i nunka mas kier a laga esaki. P’esei a aña aki atrobe lo tin pietnan di tur koló, pa hasi e fiesta di grandi i chikí akí ainda mas kolorido. Tur kos ta kuminsá for di 8or riba Plasa Brion ku presentashon di tur e ganadónan di Cura stars Strea Chikí huntu ku Blitz den su konstelashon nobo. Despues ku Sanikolas i su pietnan baha for di boto na Mattheywerf nan lo sigui den un parada pa Plasa Brion kaminda e fiesta grandi lo sigui. Hopi kantika nobo, hopi kenshi i hopi alegria e pietnan lo sòru p’e. Despues di Plasa Brion Sanikolas i su Pietnan lo pasa den kaya grandi di Punda pa despues drenta nan vehíkulonan direkshon pa KFC Sta. Maria. Aki lo tin un ambiente dushi kaminda nos muchanan por balia ku e pietnan i tambe saka potrèt ku Sanikolas. E siguiente stòp lo ta na Parke Tropikal. Tur e muchanan ku no a alkansá yega Punda por bai disfrutá di un dushi ambiente ku Sanikolas. Aki muchanan di Fundashon Mayor di Kriansa tambe lo hasi un bishitá serka Sanikolas. Mas atardi, tur mucha di rònt Kòrsou i rònt mundu por disfrutá un biaha mas di Sanikolas i su Pietnan ku lo ta live den studionan di Tele-Curacao. Naturalmente un fiesta grandi asin’aki no ta posibel sin ayudo di komersio. E aña aki un biaha mas MCB i Lito huntu ku Hucor ku su restorantnan KFC, Subway i Pizza hut i Tele -Curacao, CPA/KTK, Ennia, PSB Bank, Bo Faktura, Kusters ku Nestle i Suntop, Curoil, Auto City, PWC i Gobièrnu di Kòrsou huntu ku otronan ku tambe ta hasi e fiesta aki posibel ku ta Selikor,  Fraal import & export, WTC, Margil Party Rental, Hotel Howard Johnson i Kuerpo Polisial. Sin nan lo no tabatin yegada di Sanikolas e aña aki. P’esei Fundashon Pa Nos muchanan ke yama nan un danki di kurason na nòmber di tur mucha di Kòrsou. I for di awor ta invitá grandi i chikí pa bin risibí Sanikolas i su pietnan djasabra dia 15 di novèmber awor.