Seshon di KPMG riba IT Governance & Cyber Security bon bishitá

WILLEMSTAD 24 di aprel 2017– ‘Are you in control?’ Dirigentenan i profeshonalnan di IT di e mundu finansiero a trata e pregunta akí en konekshon ku IT Governance & Cyber Security djamars pasá, aki na Kòrsou. E tópiko a hala un sala di konferensia yen den e ofisina di KPMG na Emancipatie Boulevard. Loke a sali na kla ta, ku prevenshon, detekshon i korekshon kontínuo riba tereno di krímen cibernétiko mester haña atenshon na nivel gerenshal.

Institushonnan finansiero den Karibe Hulandes tambe mester kumpli na tempu ku e normanan di e ‘SWIFT Customer Security Program’ ku lo introdusí próksimamente i ku lo bai konta mundialmente pa e sektor. Ku esaki ta limitá atakenan cibernétiko – ku ta kada bes mas frekuente internashonalmente – i e riesgonan konserní, te un mínimo.

Huntu responsabel

No por konsiderá protekshon di informashon komo ‘djis un asuntu di IT’ mas, sinó komo un responsabilidat konhunto di organisashonnan. P’ esei cyber security mester di atenshon na e nivelnan di mas haltu di organisashonnan i mester ta prominentemente riba agènda tambe.

Brigitte Beugelaar, Partner den IT na KPMG Hulanda, a papia den e konteksto akí di e madures di organisashonnan di IT den institutonan finansiero. Cai Walters i Marc Kross a kompartí nan pèrspèktiva for di Banko Sentral di Kòrsou i St. Maarten tokante IT-Governance, e plannan futuro enkuanto e SWIFT CSP i kiko institutonan finansiero por hasi pa kumpli ku e rekisitonan. Charlton Donker di Caricert a informá tokante e atakenan cibernétiko mas komun den nos region i tambe e retonan en kuestion.

Faktor hende

Ora di minimalisá riesgo i daño, e ‘faktor hende’ ta di gran importansia. P’esei ta imperativo pa mantené e personal bon na altura i konsiente di e riesgonan ku tin. E panorama di riesgo ta kambia kontínuamente i organisashonnan mester sigui atendé ku esaki i avansá sam-sam ku e desaroyonan den nan sistemanan di kòntròl. Idealmente, institutonan finansiero no tin ku kompetí riba tereno di cyber security sino hustamente kolaborá mas tantu posibel i ta kompartí eksperensianan, pa promové ku tur ta sufisientemente prepará pa insidentenan cibernétiko. Ya no ta asuntu di ku si kisas un dia bo organisashon lo hañ’ e ku un insidente cibernétiko sino di ku ta ki dia esei lo sosodé.

Regularmente KPMG Dutch Caribbean & Suriname ta organisá seshonnan riba temanan relevante i presentando posibelsolushonnan. Kompartiendo konosementu a traves di e ret di KPMG i tambe regionalmente, e partisipantenan por interkambiá di idea i konseho pa enfrentá retonan ku éksito.