Durante e último siman di luna di òktober último, e kompania hulandes di BSI, representá pa sr. Piet Coevert i sr. Ali Yeganeh a ouditá e sistema di Selikor riba maneho di kalidat i di medioambiente. Komo resultado di e ouditorio a konkluí ku Selikor ta mantené su sertifikado riba maneho di kalidat i di medioambiente. Durante e proseso e kompania ku ta enkargá ku e ouditorio a registrá un adelanto supstansial pa Selikor den su forma di funshoná. Selikor pa di 13 aña ta hiba un maneho segun e normanan di ISO 9000 ku ISO 14001. E proseso di ISO ta unu kaminda ta plania i stipulá tur e trabounan ku mester hasi pa mantené un kalidat di servisio na nivel, kumpli ku normanan internashonal stipulá riba maneho di medioambiente. Ku e ouditorio aki Selikor a prueba ku su maneho ta konsistente. Durante aña tabatin momentunan di kontròl i korekshon interno i eksterno pa finalmente kumpli ku e normanan ku a keda stipulá. Otro punto importante ku a bin dilanti durante di e ouditoria ta ku Selikor a bin ta traha muchu mas strukturá ku e meta pa mantené e kalidat di servisio haltu na e kliente. Asina tambe Selikor a konosé un adelanto den su prestashon di trabounan. Tur esaki ku un bista riba mehorashon kontinuo. E kliente ta para sentral den e sistema di kalidat i di medioambiente. Pa Selikor e sertifikashon di ISO no ta algu pará riba su so. E sertifikashon ta forma parti di e maneho di kompania, kombiná ku e tareanan diario. Énfasis di e operashon ta riba un base regular ta kontrolá, registrá, i file tur loke tin di haber ku e prosesonan riba maneho di kalidat i di medioamabiente. E sistema di ISO ta perkurá pa Selikor tin un instrumento ku ta garantisá ku tur aktividat di Selikor ta keda realisá na un sistema di kalidat, konforme palabrashon hasí.