SELIKOR TA REKORDÁ TUR EMPRESA PA ATENDÉ RESPONSABEL KU NAN SHUSHI


Tur organisashon ta obligá segun ordenansa 47/48 di shushi sólido i kímiko pa atendé ku e shushi ku nan aktividatnan ta produsí di forma adekuá. Nan por skohe pa nan mes hasi esaki (ku eksepshon di esnan ubiká den sentro di suidat) òf nan por hasi uso di servisionan di Selikor òf di otro transportadó privá. Pa hasi uso di servisionan di Selikor mester sera un kontrakt ku Selikor ya ku e servisio no ta grátis.

Manera ta konosí, for di 1995 na Kòrsou tambe nos ta apliká e prinsipio di ‘de vervuiler betaalt’. Pa produkshon di shushi esaki konkretamente ta enserá ku tur ku ta produsí shushi ta finansieramente responsabel pa deshasí di esaki di forma responsabel.

Pa kasnan di famia i establesimentunan situá den sentro di suidat gobièrnu a introdusí na 1995 e impuesto di shushi, di kua e kobransa ta den man di Aqualectra. Organisashonnan pafó di sentro di suidat no ta kai bou di e lei di impuesto di shushi i no mester paga e impuesto akí. Nan ta liber pa skohe ken nan ta laga deshasí di nan shushi.

Si e kompania òf organisahon skohe pa laga Selikor atendé ku su shushi, esaki lo mester wòrdu formalisá den un akuerdo firmá pa ámbos partido. Selikor ta rekohé shushi na kompania i otro organisashon segun e frekuensia deseá pa e kliente. Pa fasilitá e proseso di rekohementu di shushi ta hasi uso di kònteinernan di shushi di diferente tamaño, segun nesesidat di e kliente.

No ta pèrmití pa ofresé shushi di kompania huntu ku shushi di kas i sigur no ta pèrmití pa hinka shushi di kompania den kònteiner di kas. Un kliente ku hasi su mes kulpabel na esaki ta kore e rísiko ku Selikor no ta bai ku su shushi. Pa evitá esaki ku konsekuensianan desagradabel pa henter a área, ta urgi tur organisashon pa kumpli ku e regla akí. Pa mas informashon tokante di esaki òf pa kualkier pregunta adishonal, por tuma kontakto ku nos via di nos servisio na kliente na 434-1300, via di nos adrès elektróniko info@selikor.com òf via di nos página di facebook selikornv.