Sembradó di Speransa ta kla pa bai Seú


Kòrsou ta tempu pa sembra den e ser humano, ban invertí den nos Kultura i formashon.

Willemstad, 19 di febrüari 2018 – E hobennan di Fundashon Motivá, Guia i Protehá (FMGP) ta introdusí grupo di Seú ‘Sembradó di Speransa’. FMGP a lanta na 2015 ku e meta prinsipal pa motivá, guia i protehá e siudadano yu di Kòrsou, pero spesialmente nos hóbennan riba tur aspekto ku tin di haber ku desaroyo di nos país. Hasiendo uzo di formashon i edukashon Fundashon Motivá, Guiá i Proteha ta kontribuí i duna bèk na nos komunidat. E aña aki pa promé bes FMGP ta partisipando na Marcha di Seú di Kòrsou i pa esaki a lanta e grupo ‘Sembradó di Speransa’.

Meta di e grupo ta pa sembra speransa pa nos por kosechá amor, sabiduria, rèspèt, union i formashon den nos komunidat. Nos kada un komo persona mester di sufisiente Motivashon pa alkansá nos meta, un bon Guia pa mantené e pensamentu sano i Protekshon pa kuida i respetá nos balor propio. E tres faktornan aki den bida ta pone ku komo persona nos por keda di ‘focus’ riba nos metanan i alabes mantené nos mes den un stabilidat humano. “Loke bo planta awe, lo bo kosechá mañan”. Ku e pensamentu esaki partisipashon di grupo Sembrado di Speransa den Seú 2018 ta marka inisio di un proyekto pa eduká i forma siudadanonan ku un pensamentu sano, ku sa di kuida i respetá balor propio i asina ta un persona ehemplar den nos komunidat. Wapando den kayanan di Kòrsou nos lo sembra simianan i selebrá nan kosecha.

Fiesta di Simia
Hopi bes nos komo ser humano no ta duna elogio i atenshon na nos propio logronan personal, pero si nos ta selebrá ku kosnan superfisial i material. A yega ora pa nos trese un kambio na esaki i kuminsa selebrá nos propio logronan i tambe logronan di otro i p’esei Grupo Sembradó di Speransa su tema pa Seú 2018 ta ‘Fiesta di Simia’. E simianan ta simbolisá logronan individual di kada siudadano riba nos dushi isla.

Puntra bo mes un ratu, kua instansia òf empresa por a logra sin aporte i konosementu di e ser humano? Hopi ta esnan ku por selebrá aña nan di eksistensha bunita i respetá, pero sin e ser humano ku su konosementu i dedikashon esaki lo no tabata posibel. Partisipandó den Marcha di Seú nos di grupo Sembradó di Speransa no solamente kier engrandesé i yuda konservá nos fiesta kultural, pero tambe uní nos pueblo aún más. Nos tur tin un soño i nos tur tin un tarea riba e planeta tera aki i hopi biaha ta falta nèt e tiki awa òf konosementu pa nos por sembra i/òf kosechá. Ku kada kosecha nos ta yega mas serka di e punto final kual ta felisidat den kada kas di famia i un Kòrsou kargá ku positivismo i alegria.

Si abo tambe kier forma parti di grupo Sembradó di Speransa i nos Fiesta di Simia, bo ta keda kordialmente invitá pa nos promé enkuentro djasabra awor 24 di febrüari pa 7or di anochi na Curaçao Maritime Museum na Scharloo. E anochi aki nos lo tin demostrashon di trahe i alabes kompartí tur informashon pa abo tambe djòin nos kunuku di plantashon durante e temporada di Seú.

Pa más informashon por tuma kontakto ku Jenisse Gil na telefon + 5999 676 1768 òf via página di Facebook di Fundashon Motivá, Guia i Protehá òf manda nos un mail na info@fmgpcur.com