Willemstad – Fundashon  Development Of Jazz And Creative Music Foundation Curaçao (DOJACMC ) huntu ku Sentro di Bario Seru Papaya, ta presentá un konsierto di Músika di Jazz kreativo pa hóben i famianan di e sentro. Esaki ta tuma lugá djasabra awor 23 di ougùstùs  di 6or pa 8or di anochi . E konsierto ta na enkargo di saksofonista di Jazz, JJ Cool huntu ku “the Curaçao Creative Jazz Music Ensemble”. Direktor di fundashon  DOJACMC,  sr. John James Willekes i sra.  Edna Monifa Willekes-King, a selekshoná Sentro di Bario Seru Papaya komo e promé sentro di bario pa ta anfitrion di un konsierto grátis di músika jazz kreativo. Segun e publisista di DOJACMC , sra. Willekes-King, e meta ta pa trese, spesialmente pa hóbennan den bario, músika krioyo kreativo di jazz. Nos ke pa e ambiente ta bunita, inspirativo i mas perfekto posibel pa e hóben i adultonan risibí i interpretá e músika. E sentro di bario lo ta dekorá ku arte outéntiko di Ghana i West Afrika, i ku pinturanan di nos artista lokal Asyla ten Holt. Na entrada lo tin un mini-eksposishon di bida i karera di diferente artista di jazz yu di Kòrsou. Sr. John James Willekes – JJ Cool ta enfatisá ku e meta ta pa yuda desaroyá i inspirá e siguiente generashon di músiko yu di Kòrsou, pa kuminsá apresiá i komprondé e Arte di músika i inspirá nan pa ta e próksimo  jazzista nan . E seri di konsierto grátis aki “Look Listen & Learn”, esta   Wak, Skucha i Siña,  ta un idea original di saksofonista John James Willekes , ku e meta pa trese Jazz direktamente na hóbennan den tur bario di Kòrsou. Willekes ta bisa “ nos ke pa e hóben den bario ta sintá den ‘red carpet’ di e konsierto, komportando perfektamente i mira i skucha kada noot di e músikonan tokando nan instrumento pa asina nan siña interpretá músika den na mes forma, paso na Kòrsou nos tin hopi hóben talentoso i briante !” Pa mayoria di hóbennan lo ta promé biaha ku nan ta eksperiensha un konsierto di Jazz, i naturalmente lo tuma un tiki tempu pa nan siña apresiá e músika. P’esei ta importante pa nos tuma tempu ku e hóbennan i ku nan mayor pa nan forma parti di e proyekto di Jazz  den bario. “I ta bien posibel ku e próksimo gran músikonan di Jazz ta sali for di e bario di seru Papaya” Sra. Willekes-King ta menshoná ku histórikamente “Jazz no ta solamente parti di e historia di músika Merikano , pero parti di historia mundial di músika , pasobra su orígen ta bini di hendenan for di tur kontinente manera Afrika, Oropa, Merka i di Karibe. Meta di e konsierto grátis aki ta pa konektá músika kreativo di jazz ku músika krioyo di Kòrsou, den un ambiente kolorido i artístiko . Fundashon DOJACMC ta gradisí sinseramente tur e spònsernan ku ta yuda realisá e serie di konsierto “Look, Listen & Learn” den bario. E konsierto ta kuminsá 6or en punto te 8or di anochi djasabra 23 di ougùstùs . Pa mas informashon por tuma kontakto ku Señora Shanny Granville-Bitorina  Sentro di Bario Seru Papaya na tel: 5290725