Willemstad- Djasabra 6 di juni próksimo, Curacao Innovation & Technology Insitute (CITI) ta organisá dia habri pa pueblo di Kòrsou.

CITI (ántes Stimul-IT i InnovatieCentrum Curaçao) lo habri su portanan pa komunidat por sera konosí ku CITI i en partikular e Fab Lab.

Fab Lab ta un konsepto internashonal ku a bira masha popular den e último añanan. E ta un plataforma tékniko ku ta ekipá ku artefaktonan di teknologia avansá pa usuarionan por hasi tur tipo di invento i inovashon. Ta importante pa enfatisa ku hasiendo usi di un Fab Lab bo por produsi kasi tur kos. Esaki ta yuda stimulá inovashon den komèrsio lokal. Den e Fab Lab di CITI bishitante nan por sera konosí ku e famoso 3D printer. Pues durante e dia lo tin demostrashon di diferente material ku por ser produsí den e Fab Lab aki. Tambe boluntarionan por inskribí riba e dia aki pa yuda usuarionan di e Fab Lab.

E dia habri lo ta di 1or pa 5or i ta dirigí riba komunidat kompleto for di e studiante te ku e komersiante. Tambe por haña informashon adishonal di proyektonan ku CITI ta trahando riba dje aktualmente. Importante ta pa komunidat haña un bista di loke CITI por ofresé na proyekto ku e meta pa stimulá desaroyo duradero di nos ekonomia.

CITI ta un instansia supsidiá pa MEO,  ku ta traha dirigí riba inovashon i teknologia pa alkansá un ekonomia duradero. E ta konosí pa projekto pa hobennan, training i workshopnan pero tambe insentivonan pa stimulá komersiantenan. Pa mas informashon tokante nos dia habrí por bishita nos wèpsait www.citi.cw òf yama 738-6299.