WILLEMSTAD – E kompania Seven Seas Water (SSW) a regalá e 260 alumnonan di e  skol di fundeshi Emmy Berthold na Suffisant dos kuler di awa friu. Sigur den temporadanan ora e muchanan ta sofoká pa e kalor inmenso, esaki ta un kontribushon plasentero, segun e kabes di skol Laurina Leshommes. Seven Seas Water ta un empresa Merikano ku tur kaminda na mundu ta brinda solushon kaminda mester di awa pa konsumo òf finnan industrial. Na Kòrsou SSW ta produsí awa a base di e sistema di reverse osmosis pa CRU riba tereno di Isla. Na St. Maarten SSW ta produsí awa pa e kompania di utilidat GEBE. SSW gusta duna bèk na e komunidatnan kaminda e ta aktivo. Kantika di gratitut Ora SSW a tende ku e skol aki di ‘Evangelische Broedergemeente’, ku ta hospedá mucha entre 4 i 13 aña den e gruponan 1 te i ku 8 for di e barionan Muizenberg, Suffisant, Kanga i Dein, tabatin un nesesidat grandi pa kuler di awa friu, SSW a ofresé pa kumpra i laga instalá nan. Esei a sosodé i liderato i alumnonan ker a mustra e dunadó ku nan ta apresiá esaki enormemente. Tabata un bunita gesto ku un di e klasnan spesialmente pa e okashon aki a prepará un kantika di gratitut i esaki nan a kanta pa e dunadó. SSW a primintí di sigui mantené e kulernan di awa.