WILLEMSTAD,- Wikènt ku a pasa tabata otro tremendo wikènt di e “Three man Show” di Bululú Formal Riba Ruta di Karnaval. Tabata un wikent di San Valentino kaminda varios pareha a bin gosa di e tremendo Three Men Show Bululu riba Ruta di Karnaval. Un show protagonisá pa Edion(Tan Cleta)Boy, Germain(Ma Yeta)Jansen i Boskwiri (Pitufo) Benita. Nan ta presentá vários chiste di Karnaval pa despues nan drenta e Bululú mes Riba Ruta di Karnaval. E wikènt aki Teatro Luna Blou & La Tentashon ta presentá dos funshon mas di Bululú formal riba ruta di Karnaval djabièrnè 21 i djasabra 22 di febrüari nueb’or di anochi den e sala ku erko di La Tentashon. Edion Booy, Germain Jansen, Boskwiri Benita huntu ku nan personahenan Tan Cleta, Pitufo & Ma Yeta lo trese dos funshon karga ku susesonan ku ta pasa promé, durante i te asta despues di Karnaval. Lo bo hari bo barika yen ora ku nan trese tur e susesonan aki den un bachi chistoso. Festival di Tumba, elekshon di Prens i Pancho, Reina, Susesonan riba ruta di Karnaval, den marcha i hopi mas. Bin pa bo sa ta kuantu Bululú tin riba e ruta di Karnaval. Wak pa bo no pèrdè Bululú Formal Riba Ruta di Karnaval Despues di e wikènt aki ta dos funshon mas so ta bai tin dia 26 i 27 di februari. La Tentashon a amplia su kapasidat di stul pa asina mas hende por gosa di e tremendo Three Men Show aki. Despues di e funshon di 26 i 27 nan ta bai Aruba. Karchinan ta optenibel na takia di Teatro Luna Blou i na Time to Time den saliña. Pa mas informashon por yama 4622209. Bo por bishita nos página wèp. www.latentashon.com òf tira un bista riba facebook: la tentashon.