Organisadó di konsierto i shownan teatral, Shout Productions, a funda Shout Academy aña pasá dunando hobenan e oportunidat pa sigui un masterclass gratis di artistanan konosí. Riba djaluna 10 di aprel tin un masterclass di kantante Izaline Calister na Kòrsou.

Pa nos shownan hopi artista ta biaha bin e region aki, i ta sumamente fantástiko di por haña lèsnan i konsehonan di hústamente e artistanan grandi aki. Asina nos ta spera ku e hubentut ku talento ta keda motivá pa keda desaroyá nan talento.

Izaline Calister ta un kantante internashonal, e a gana e prestigioso Edison Award na 2009 i ta prinsipalmente konosí pa su músika úniko kual ta konsistí di un kombinashon di músika tradishonal di Kòrsou i jazz vokal. Calister a saka 8 álbùm i a presentá rònt Europa, Indonesia, USA i Suramérika. Calister ta riba nos isla den e periodo ei debí na su presentashon durante e L*Lverhalen na Brakkeput Mei Mei riba 8 di aprel ku Howard Komproe, Jetty Mathurin i Everon Jackson Hooi.

En kolaborashon ku CCC – Cultureel Centrum Curaçao nos ta organisá riba djamars 4 di aprel un ronda di oudishon kaminda tur hende di 12 pa 18 aña por partisipá. E komishon ta selektá un máksimo di 10 partisipante ku ta mas prometedor. E dies hobenan aki por partisipá sin kosto na e motivational masterclass.

E oudishon pa e motivational masterclass ta riba djamars 4 di aprel pa 18:00 or na CCC Cultureel Centrum Curacao. Inskripshon ta nesesario i por sólamente via e wepsait di Shout Productions. Aki por risibí mas informashon.

www.shoutcuracao.com