Willemstad – Den kuadro di Dia Internashonal di Bestia Fundashon Parke Tropikal a bin ku un idea pa organisá un Siman Bestial. E siman ta kore di 27 di sèptèmber pa 5 di òktober. Durante Siman Bestial ta bai tin un ‘Zoo-hunt’ i un ‘Fun & Family Day at the Zoo’. Zoo-hunt ta tuma lugá riba djasabra 27 i djadumingu 28 di sèptèmber i djasabra 4 i djadumingu 5 di òktober un Fun & Family Day at the Zoo.Banda di e eventonan akí Fundashon Parke Tropikal a produsí 4 programa spesial ku lo pasa durante di Siman Bestial tantu na CBA Television komo TeleCuracao ku e meta pa konsientisá nos komunidat di e importansia i balor agregá di nos parke. Ku Siman Bestial Fundashon Parke Tropikal ke rekoudá por lo menos 150 mil florin pa yuda ku e proyektonan mas agudo di e parke. Si bo ta amante di “scavengers hunt”, Zoo-hunt sigur ta un aktividat ku bo no por faya. Zoo-hunt ta bai bira hopi gezellig i den un palabra; BESTIAL. E ta tuma lugá djasabra 27 i djadumingu 28 di sèptèmber. Ku 4 persona den outo pagando solamente NAf 100,- bo ta partisipá. Un Zoo-hunt ku hopi ‘challenge’ i chèns pa gana premionan fabuloso. Pa partisipa ta fásil. Pasa inskribí bo grupo na Parke Tropikal di djaluna pa djabièrnè di 10 or di mainta pa 5 or di atardi. Korda ku bo kontribushon lo soru pa nos parke sigui desaroyá. Fun & Family Day at the Zoo ta tuma lugá dia 4 i 5 di òktober di 10 or di mainta pa 5 or di atardi. Entrada pa grátis. Lo bai tin rekorido interesante den parke pa nos muchanan. Hopi wega di feria ku premionan masha atraktivo. Chang’e porko, hala lechi ta entre otro algún di e weganan super dushi ku lo tin e dianan aki. Un ‘foodcourt’ ku masha hopi kos di kome i di bebe. Entretenimientu i hopi mas. Por hasi donashon di material di enrikesimentu pa e bestianan, pero tambe di sen. MCB ta soru pa tin mashin di swipe pa fasilitá tur bishitante. Organisashon di e eventonan aki ta tuma hopi tempu, p’esei Fundashon Parke Tropikal a aserká algun amigu di parke pa forma un komishon. E komishon aki a yama su mes Komishon Bestial i boluntariamente a tuma na nan enkargo pa organisá e eventonan aki. Komishon Bestial ta keda forma pa Mariela Romero, na nomber di Fundashon Parke Tropikal, Bert Isenia, mènedjer di parke, Solange Trinidad, Ramsey Jansen, Alwin Hart, Chehadi Eddine i Claudia Rigaud. Ta bale la pena menshoná ku durante di Siman Bestial tin mas ku 250 boluntario ku ta yuda den diferente forma i area. For di produkshon, filmashon te na esnan ku ta para den stènt di e diferente weganan, bar, limpiesa i mas. Fundashon Parke Tropikal ke yama danki na e partner i amigunan ku ta hasi Siman Bestial un siman eksitoso ku ta CocaCola, Maduro & Curiel’s Bank, Rotary, CBA Television, Tele Curacao, TCFM 93.3, Go Weekly, Kortijn Ijs, AVF Paint, Sargo Wood Products, Global Paints, Building Depot, Lover’s i Venequip. Pa mas informashon di Siman Bestial, Zoo-hunt, Fun & Family Day at the Zoo i e programa nan di informashon por jama 736 0188 of wak e facebook page di Parke Tropikal.