Willemstad – Djárason mainta Curaçao Airport Partners huntu ku organisashonnan di emergensia i partnernan den mundu di aviashon a simulá un situashon di emergensia na aeropuerto di Kòrsou. Ophetivo di e ehersisio tabata pa evaluá kon personal na aeropuerto i di organisashonnan di emergensia ta reakshoná na momentu ku un insidente tuma lugá. Tambe ta evaluá si e proseso di evakuá i ofresé asistensia na víktima ta kana segun e plan di  emergensia; si e ekipo i komunikashon ta traha efisiente i efikas; i si ta duna atenshon i kuido na esnan envolví (nazorg).

Durante e ehersisio a simulá un aksidente ku avion tipo MD-83 di aeroliña fiktisio ‘XYZ’ okashoná dor di problema tékniko. Banda di e avion ku InselAir a pone disponibel pa e ehersisio, CAP tambe a risibí sosten di 67 hóben di Brigada i Fundashon Speransa. Curaçao Airport Partners a ehekutá e training huntu ku servisionan médiko, Ambulans, Blauwe i Rode Kruis, Departamentu di Brantwer di Kòrsou, Polis, Departamentu di Maneho di Desaster i FOL (Forward Operation Location/Air Force). CAP tambe por a konta ku partnernan den aviashon i tim di emergensia komo opservadó kritiko durante e training, ku lo duna e input nesesario pa e evaluashon di e ehersisio.