Willemstad – E siman aki, ku un ‘soft opening’, Jet Centre Curaçao a kuminsá ofresé su servisionan VIP na personanan ku ta biaha ku jet privá òf jet di kompanía. Un inougurashon ofisial ta planiá den futuro serkano. E Jet Centre ta Kòrsou su promé terminal  dediká na ofresé un grupo spesífiko ku ta biaha pa i for di Kòrsou ku avion privá òf ‘corporate’, un eksperensha más luhoso i komodo. Jet Centre Curaçao ta situá den un edifisio otro for di e terminalnan komersial na Aeropuerto di Kòrsou i ta ofresé servisionan eksklusívo manera Imigrashon, Douane, ‘General Aviation’, seguridat, konsúmo, fasilidat pa reuní i hopi mas. E fasilidat na Curaçao International Airport dediká na usuarionan di jet privá i ‘corporate’ ta yuda diversifiká posishon di Kòrsou, hasiendo nos país mas atraktivo pa e grupo spesífiko aki. Ademas, otro sektor i dunado di servisio na Kòrsou, por ehèmpel Turismo, hürdo di servisio i produktonan VIP òf hotèl luhoso, por tin benefisio di e desaroyo nobo aki na aeropuerto. Sin duda tin un demanda pa e tipo di servisio aki den nos region. E posishon logístiko di Kòrsou, i tambe e preis di kombustibel ekonómiko, ta hasi e Jet Centre Curaçao hopi kompetitívo den Karibe. Curaçao International Airport ta risibí aproksimadamente 3300 avion privá pa aña. CAP tin e ekspektatíva ku esaki lo sigui krese ora Jet Centre Curaçao wòrdu posishoná den e merkado ‘niche’ aki.