Willemstad– RBC ta aportá na kousanan den nos komunidat pa kontribuí na un mihó pais i komunidat. Den e área di salubridat e banko a bin ta sostené KinderKanker fonds di Prinses Wilhelmina Fonds ku varios proyekto pa generá e fondonan nesesario p’e fundashon aki por sigui duna e pashentnan yong huntu ku nan famia e sosten for di momentu ku nan afiliá na e fundashon i tin mester di tratamentu i kuido pa kanser. Antisipando riba e luna di kolekte di Prinses Wilhelmina Fonds den september, RBC a invitá respresentantenan di PWF (Alba Martijn), KinderKanker fonds (Frieda Geller), y famia Carmelita (Sobrebibiente) pa nan seshon di informashon na empleado kaminda nan a presentá nan trabounan dilanti tur presente. Mayornan di e hoben sobrebibiente di kanser a duna un testimonio kaptivante tokante nan eksperensia i trayektoria ku kanser serka nan yu homber for di inisio te ku awor. Ku su aktikut positivo e hoben mes a demonstrá na tur presente, ku kanser bou di mucha ta tratabel, kurabel i kon importante ta pa e mucha por keda mucha. Al final Steven Coutinho, Managing Director di RBC, a hasi entregá simboliko di e chèk di 10 mil florin na KinderKanker fonds.