Sr. Roland Colastica ta e próksimo Presidente di Fundashon Kas di Kultura (KdK)


Willemstad – Den e reunion di Konseho di Minister di djárason 15 di novèmber último, sr. Roland (Roy) Colastica, a wòrdu enkargá ku e Presidensia di Kas di Kultura pa e 4 añanan benidero.

Den e kuadro aki, e punto di salida prinsipal ta e Akuerdo di Gobernashon 2017-2021: Union den Diversidat!

Diversidat kultural a emergé komo punto di lansa den e era nobo aktual. UNESCO i su miembronan ta konbensí di e balor inherente i e nesesidat di un aserkamentu salí for di e prinsipio di “Diversidat kultural mundial”.

Importante den e kuadro ta:

  1. realisá un analisis di palèt di e diversidat kultural den tur su aspektonan;
  2. mustra riba e importansha di diversidat kultural den diferente area (p.e. lenga/ idioma, edukashon, komunikashon i kreatividat), ku ta importante pa promoshon di diversidat kultural;
  3. inbertí den diversidat kultural ku ta un dimenshon esensial di diálogo kultural.

E aserkamento menshoná por sirbi komo un renobashon pa un desaroyo sostenibel di nos pais. Di e forma aki por garantisá alabes koheshon soshal, union i rèspèt pa derechinan humano i e libertat universal.

E rapòrt di UNESCO “Investing in Cultural Diversity and Intercultural Dialogue” i e vishon manera stipulá den e dokumento “Culture: a driver and an enabler of sustainable development” por enrikesé nos aserkamento lokal pa ku kultura! Minister Alcalá-Wallé ta konta riba sr. Colastica komo un team-player importante riba tereno kultural pa huntu hasi trabounan riba tereno kultural pa realisá un mihó komunidat.