E di tres pa Kòrsou i e promé den Caribe i Latinoamérika den su estilo

WILLEMSTAD – Yüli – Djarason último Kòrsou a selebrá apertura di e terser establesimentu di Starbucks.  Mesora ta suprayá kon privilegiá Kòrsou ta, teniendo kuenta ku esaki ta e promé establesimentu di Starbucks den Caribe i Latinoamérika ku lo tin e konsepto ‘Starbucks Evening Program’.  E establesimentu nobo di Starbucks ubiká na Mambo Beach Boulevard sigur lo bira un sitio hopi frekuentá. Anteriormente, Kòrsou a konosé Starbucks semper den un konsepto di ‘mainta’, na unda ku por disfrutá di e.o un dushi kòfi, un croissant, pastechi of un donuts. Klaro, parti anochi e establesimentu ta ‘bibu’  i ta ofresé un ambiente úniko na unda tur ku ta frekuentá e área di Renaissance Mall por sosialisá.

Tur establesimentu di Starbucks tin su propio identidat, Starbucks Mambo Beach Boulevard lo tin un tema  artístiko i lo figurá pinturanan di e artista Jimena Tafur. E konsepto di un establesimentu asina’ki a konta ku vários estudio, por bisa ku a tene kuenta ku un atmósfera ku ta inspirá kombersashon i ta ofresé relahamiento. Diseñadónan  a enfoká riba diferente elemento inkluyendo lus, mesanan mas largu i grandi, kolónan kaluroso i arte.  Di akuerdo ku ehekutivonan di Starbucks, “Ta e idea pa nos duna Kòrsou e máksimo di un ‘Stabucks Experience’. For di e menú pa e ambiente- tur kos ta desaroyá ku e meta pa ofresé nos klientenan e mihó eksperensia posibel den kada un di nos establesimentunan.”

E ‘Starbucks Evening Program’ lo ofresé un menú di biña, serbes i klaro un selekshon amplio di kòfi i te. Tur establesimentu ku tin un  ‘Starbucks Evening Program’ tin un lista di biña ku a keda selektá dor di Starbucks su eksperto, Rachel Antalek. Estudionan hasí dor di Starbucks ta divulgá ku e amante di kòfi di 18 aña bai ariba, hopi bes ta amante di biña tambe i klientenan di Starbucks dependiendo e okashon gusta un serbes bon friu. Tambe lo ofresé platonan chikitu ku fásilmente por wòrdu kompartí entre bishitantenan. E promé establesimentu di Starbucks ku un ‘Evening Program’ a keda habrí na 2010, na Seattle. Klientenan a keda enkantá; for di e aña ei e demanda pa un punto di enkuentro kasual parti anochi a krese.

Ayera, ta marka apertura di e di 3 establesimentu di Starbucks na Kòrsou, despues ku na 2011 a habri Starbucks na Renaissance Mall i mas despues den hotèl , awe ano 2016 Kòrsou por ta orguyoso di por tin e promé establesimentu ku un  ‘Starbucks Evening Program’ den Caribe i Latinoamérika i su di tres Starbucks riba nos isla. Bishitá Starbucks na Mambo Beach Boulevard tur dia di siman; di  djadumingu pa djaweps for di 7’or di mainta pa 11’or di anochi i djabièrnè ku djasabra for di 7’or di mainta pa 12’or di mardugá.