WILLEMSTAD — Start Up Curacao ta un inisiativa nobo ku a nase for di un grupo di empresario hoben ku hopi biaha ta wordú konfronta ku e mesun limitashonnan i oportunidadnan na momentu di hasi negoshi na nos mes pais ò den region. E empresarionan aki ta komparti e pensamentu ku un kolektividat di Start Ups aki na Kòrsou ta benefisioso no solamente pa e komunidat empresarial so, si no tambe pa e ekonomia en general. Dor di alsa e ekonomia di Kòrsou na un nivel mas haltu, nos pais ta bira mas atraktivo i notabel pa inversionista i/ò klientenan internashonal. Pues será alliansanan nobo ta e ingrediente indispensabel pa por alkansa e meta aki. Start Up Curaçao kier invita e komunidat empresarial kompletu pa forma parti di e lansamentu ofisial di e plataforma inovativo, kreativo i dinamiko aki. E evento lo tuma lugá djabierne awor, 28 di novèmber 2014. Di 7or pa 10or di anochi na Caquetio Lodge. Lo bai ta un anochi sumamente interesante kaminda oradornan ku eksperiensia empresarial internashonal lo bai komparti nan historia. A la bes lo tin oportunidat pa sera alliansa nobo i interkambiá informashon tokante e nesesidatnan primordial bou di e partisipantenan. Pa mas informashon bishita e wèpsait www.startupcuracao.org ò e página di Facebook ‘Start Up Curaçao’.