WILLEMSTAD – Huntu ku Reda Social i Curaçao Hospitality Training Foundation (CHTF) Stichting Educatie Granbeeuw (SEG) a kuminsa ku e kurso di dos aña “kóki independiente – nivel 3” (supervisor di kushina). 26 di yanüari 2015 lo kuminsa ku e kurso  “kóki – nivel 2” i pa luna di mart e kurso basiko di idioma “abilidad di kombersá na aleman” lo kuminsá. Tambe un kurso di “Barkiper” lo kuminsá den luna di aprel/mei. E kursonan ta wordu finansiá door di Reda Social i CHTF i e kursista ta paga un kontribushon chiki. Academy Hotel Curaçao ta e lokalidat pa e lèsnan. E parti praktiko ta tuma luga den e kompanianan kaminda e instruktor (leer meester) ta asistí den e parti  aki di e kurso. E kursonan ta habrí pa hende ku ta motiva i ke siña e trabao di kóki, door di bai skol un dia den siman anto traha e sobra dianan den un “kompania di instrukshon”, e kursonan tin un durashon di 2 aña. Dosentenan di SEG ta kualifika i ta dominá tres idioma: Papiamentu, Hulandes i Spaño. Pa partisipá na e kurso di nivel 3, ta rekerí un diploma di kóki nivel 2 of algun diploma riba e mesun nivel. Ku e kursonan aki SEG ta spera di duna su aporte na e sektor di hospitalidad pa krea oportunidad pa mas trahadó diplomá. Ku e kurso di aleman un kursista por asistí un turista mas mihó na su idioma durante su estadia na Kòrsou.