Willemstad- Resientemente e orkesta Streanan di Oro di SGR-Groep i Fundashon Verriet a otorgá nan kalènder di aña 2018 na Minister Marilyn Alcalá-Wallé. Tambe nan a duna un bunita presentashon di nan banda musikal i a entregá Minister un cd propio. Alabes e banda a hasi un petishon pa bini na remarke pa un sosten finansiero gobernamental.

Minister Alcalá-Wallé a gradisí e banda pa nan aporte na komunidat. Tumando nota ku e banda ta prosedente di e sektor di salubridat Minister Alcalá-Wallé ta aserká e sektor di salubridat pa guia e petishon di e banda. Finalmente e banda Streanan di Oro ta hasi un apelashon riba pueblo di Kòrsou pa duna un aporte pa sostené esnan ku un deshabilidat pa haña mas oportunidat pa sigui desaroyá nan mes pa medio di nan talentonan musikal. Esaki komunidat por hasi pa medio di duna nan kontribushon pa medio di kompra di un kalènder i CD.  Esakinan ta optenibel na SGR-Groep na Prinsenlaan 5. Di djaluna pa djabièrne di 9.00 pa 18.00. Tene na kuenta ku entre 13.00-14.00 ta será. Tambe por hasi pedido via di mènedjer di e grupo, sra. Angelique Presentacion, tel: 5669682.