ORANJESTAD, Aruba – 29 di october 2015: Recientemente Aruba Bank a lansa su di 7 edicion di e proyecto Good 4 the Neighborhood cu e tema e aña aki di “Become a saving star”. Actualmente studiante nan di e prome, segundo y tercer grado di Scol Practico pa Ofishi Santa Cruz cu ta den full preparacion en conexion cu e proyecto  di Spaar di Aruba Bank. Scol Practico pa Ofishi Stc ta un scol vocacional. Aki e hoben ta haya lesnan practico y tambe ta siña un ofishi. E scol ta special unda e hoben ta desaroya habilidadnan cu ta yud’e no solamente den un trabao pero tambe den su bida diario.

Den e grupo di scol tin 6 hoben masha activo den e proyecto. Nan ta Ayline Maduro, Evenezer Illidge, Aaron Rafael, Melony Boekhoudt, Shindey Tromp y Jhonathan Kock. A sinta pensa riba cua ta un di necesidadnan mas grandi di Aruba y por a ripara cu esaki ta spaarmento di awa. Actualmente Aruba ta sufriendo di un temporada di secura basta largo. Hasta damnan a bira bashi. Nan kier stimula comunidad pa busca maneranan creativo pa spaar awa. Aruba completo mester haya e mentalidad pro naturalesa.

Un otro punto cu a haci influencia pa e proyecto aki ta cu e consumo di awa di nos scol cu ta bastante halto. Esaki ta bin tambe door di entre otro e uzo di awa pa lesnan di cuido di mata, lesnan di cushina, bañamento despues di gym y labamento di paña.

A logra haya toter regalo di WEB pa nos recoge e awa cu ta spaar di wasbak, wasmashin y airco. A haci preparacionnan pa ehecuta e proyecto pa por filma esaki tambe den e movieproject. Mester a busca toter y verf esakinan, tambe a cuminsa acumula awa den hemchi di 5 galon pa haya un bista di cuanto awa lo por spaar. Otro trabou tabata coba e tereno pa pone tuberia di PVC. Ainda ta buscando tubonan di PVC pa recicla. Ta pidi comunidad, esun cu tin tubo y kier duna scol, pa manda un message riba nan facebook page y ta pasa busca nan pa e proyecto.

SPO Santa Cruz tin contacto estrecho cu Santa Rosa. Hunto cu StimAruba a colecta Mangrovenan pa cuida pa asina por disminui e impacto di e perdida di esunnan cu lo kita na momento di traha e brug na Franse Pas. Aruba completo keda pendiente di e proyecto di spaar awa. Corda like nan riba facebook y instagram na ikteachict. Scarsedad di awa ta un problema mundial ban conscientisa otronan pa nos haci menos impacto riba nos medio ambiente.