Willemstad- Febrüari– 2014: Subway komo e restorant ku konstantemente ta promové un estilo di bida salú via di su menúnan saludabel e.o e sèntwichnan for di e menú Fresh Fit den kombinashon ku moveshon físiko no a duda niun momentu pa duna su kontribushon na e realisashon di e kompetensia di boto di bela Curaçao Youth Championships (CYC). Djadumingu awor, Subway lo pèrkurá pa almuerso di tur atleta partisipante i tambe e organisashon ofresiendo nan e sèntwichnan saludabel for di nan menú i lo kontribuí na un ‘goody bag’ ku tur atleta lo risibí.  Durante di e wikènt aki, lo ofresé e partisipantenan un klínika pa kaba di perfekshoná e téknikanan ku nan lo tin mester pa optené e resultadonan máksimo durante di e kompetensia. Durante di e klínika i entrenamentu e organisashon lo hasi filmashon- despues e hóbennan lo por mira e imágennan i asina tuma aprendisahe. For di djadumingu te ku djarason lo ofresé klínika na e atletanan; nan lo risibí aproksimadamente 8 ora di entrenamentu intensivo durante 4 dia largu. Djabièrnè otro siman dia 7 di Mart e kompetensia mes lo kuminsá. Lo tin atletanan for di e.o Suisa, Alemania, Sint. Maarten, Boneiru i Kòrsou. Subway ta invitá tur amante di deporte akuátiko i partikularmente esnan ku ta sigui e desaroyo di e deporte di boto di bela pa presensiá e Curaçao Youth Championships (CYC) di e aña aki. Anualmente e interes pa e kompetensia ta kresiendo, pues e aña aki e lo ta sigur un éksito atrobe. “Esaki ta tipo di proyektonan ku nos ta aploudí, Subway tei pa yuda motivá Kòrsou pa hasi skohensianan saludabel i praktiká deporte. Den transkurso di añanan e deporte di boto di bela a bira masha popular, te hasta Kòrsou por a konta ku representashon den kompetensianan internashonal. Komo empresa nos ta kontentu di por aportá na desaroyo positivo di nos hóbennan”, esaki di akuerdo ku Sr. Randy Maurera representante di Subway. Subway ta deseá e organisashon di Curaçao Youth Championships (CYC) i tur atleta ku lo representá Kòrsou hopi éksito. Pa mas informashon tokante di produktonan i promoshonnan di Subway kòrda bishitá Subway su página di Facebook via fb.com/subwaycuracao.