Willemstad- Mei – 2015: Kòrsou ta pendiente pa e di dos edishon di e kaminata di mas kolorido i riku na ambiente ‘Curaçao Color Walk 2015’. E aña aki e lema di e kaminata ta ‘Color your live by coloring others’. For di su promé aña e kaminata aki a risibí un popularidat inmenso debí na su estilo úniko na unda ku e partisipante ta kuminsá e kaminata ku un T-shirt blanku i na final esaki ta kompletamente di fèrf ku vários kolo briante ku e partisipante ta rekohé riba ruta bishitando e stashonnan di koló (Color Station). Subway pa di dos aña konsekutivo ta duna sosten na e ‘fun walk’ aki, patrosinando e ‘color station’ ros ku lo ta yená ku entretenimentu i bon ambiente durante e kaminata. Subway ta para pa un bida salú yená ku moveshon konstante i esaki ta e motibu prinsipal pakiko Subway ta sigui duna su sosten na e proyekto aki. Dia 7 di yüni próksimo Kòrsou kompletu ta keda invitá pa forma parti di e ‘Curaçao Color Walk 2015’ na Parasasa Beach. Lo kuminsá ku un ‘warm up’ 6:30am pa despues kuminsá ku e kaminata 7’or di mainta. Na final di e kaminata lo tin e famoso ‘Big Color Splash’.  Tur ku ta deseá di forma parti di e kaminata aki tin oportunidat pa inskribí dianan 30 i 31 di mei próksimo entre 10:00am i 3:00pm riba e terasa di Subway Brion Plein. Kostonan pa e kaminata aki lo ta Naf. 15.00 pa mucha (te 12 aña) i Naf. 20.00 pa adulto. Tur ku inskribí lo risibí un T-shirt i un ‘goodybag’. Ta bon pa menshoná tambe ku durante di e mainta di e kaminata Subway lo duna tur partisipante un snack salú. Pa mas informashon di e kaminata bishitá Subway su página di Facebook òf esun di ‘Curaçao Color Walk 2015’. Di akuerdo ku Randy Maurera representante di Subway,“Curaçao Color Walk 2015 ta duna komunidat e oportunidat di moveshon i hasiendo esaki ta duna un man na un otro ku ta den nesesidat. Tur loke wòrdu generá for di e kaminata aki ta bai pa Fundashon Desaroyo i Progreso. Ta e idea pa pueblo di Kòrsou partisipá na e kaminata pa huntu nos kontribuí na e intenshon aki. Laga nos kana pa un bon kousa i eksperensiá koló manera nunka ántes”.