Subway ta invitabo partisipá òf pa apoyá e siklistanan

Willemstad, Kòrsou- yüli 2015: Dia 9 di ougùstùs próksimo Subway ta invitá tur siklista pa forma parti di e di tres edishon di ‘Subway Sorsaka Vlakte Race’. E kuminsamentu i final di e kareda di mountain bike aki lo tuma lugá riba lugá di parker di Curinde Freezone na Hato. Lo tin 15 diferente kategoria den kual siklistanan por inskribí pa partisipá.

Esnan ku ta deseá di forma parti di e ‘Subway Sorsaka Vlakte Race’ por inskribí na Vista Bike òf Dasia. Ta bon pa menshoná ku tin posibilidat pa inskribí te ku djasabra 8 di ougùstùs 5’or di atardi. Partisipashon pa miembro di Curaçaose Wielerbond (CWB) ta Fl. 15.00 pa adulto i Fl. 10.00 pa mucha. Pa esnan ku no ta miembro e inskripshon ta Fl. 25.00 pa adulto i Fl. 15.00 pa mucha. Kategorianan di e kareda di Mountain Bike ta repartí di e siguiente manera; muchanan di 6-7 aña ta kore 4KM, muchanan di 8-9 aña ta kore 6KM, muchanan di 10-11 aña ta kore 12KM, muchanan di 12-13 aña ta kore 18KM, muchanan di 14-15 aña ta kore 22KM, hóbennan di 16-17 aña ku ta den klase prinsipiante ta kore 26KM, De Dames (damanan siklista) i esnan den klase Super Master ta kore 30KM i De Elite (siklistanan élite) i esnan ku ta den klase Sub-Master i Master ta kore 40KM. Ademas di e kareda normal tin posibilidat di partisipashon pa esnan ku ta deseá di ‘tour’ òf rekreá riba baiskel. Nan lo kore 18KM. Na final di e kareda tur partisipante ta risibí fruta, dos refresko i kos di kome di Subway. Tambe lo tin un seremonia di premio na unda ku lo otorgá premio na e siklistanan ku a destaká den kada kategoria di e kareda.

Subway i Sorsaka Bikers ta hasi invitashon na tur siklista di Kòrsou pa partisipá den e di tres edishon di ‘Subway Sorsaka Vlakte Race’. E kareda aki ta suprayá Subway su kompromiso pa konstantemente motivá nos komunidat pa hiba un bida salú. Pa mas informashon tokante di ‘Subway Sorsaka Vlakte Race’ bishitá Subway su página di Facebook via fb.com/subwaycuracao òf www.subway.cw